«Ежелгі Тараз ескерткіштері» қорық-музейінің қарауындағы Жамбыл облысы Талас ауданындағы тарихи мешіт – Үшарал мешіті толықтай қайта жаңғыртудан өткізілді.
Аталған мешіт XVІІ ғасырдың аяғына қарай Әулиеата-Тараз жеріне табан тіреген өз дәуірінің зиялы қауымы жер-жерде мешіт, медреселер салу жұмысын қолға алса керек. Оған жергілікті азаматтар аянбай, қолдан келген көмегін көрсетеді.
Бүгінде Үшарал мешіті, Қарақожа мешіті, Жүнісбай, Әбдіқадыр, Нәметбай мешіттері аталатын, әлі де діндар қауымға қызмет етіп келе жатқан тарихи ғимараттар – сол дәуірлерде бой көтерген құрылыстар.
Үшарал мешітінің құрылысы 1900 жылы аяқталып, пайдалануға беріледі. Жалпы, құрылыстың басы-қасында болып, құрылысшылар тарту, материалдар дайындау ісімен сол кездегі Үшарал, Тоғызкент аймақтарының имамы болған Абдулла Ишан деген діндар адам айналысады. Терракот қыштар мен басқа да материалдар жергілікті жерде дайындалған.
Соңғы мәрте 2003 жылы «Мәдени мұра» бағдарламасы аясында «Казреставрация» мамандары, республикалық ҚазНИПИ ғылыми-зерттеу институтының жобалауымен аталған тарихи мұраны қайта жаңғырту жұмыстарын жүргізді.
Ал, биылғы жылы тарихи мұраға қайта жаңғырту жұмыстары жүргізіліп, жергілікті қауымның игілігіне пайдалануға берілді. Бүгінде аталған тарихи мешіт тарихи-мәдени мұра ғана емес, ауыл тұрғындарының имандылық, ізгілік үйіне айналған.