Кездесу барысында қос тарап Қазақстан-Доминикан арасындағы ынтымақтастық мәселесін талқылап, саяси декларацияға қол қойды. – Біз маңызды, сындарлы келіссөз өткіздік. Бұл құжатта екі ел арасындағы қарым-қатынастардың басты аспектілері мен ведомствоаралық құжаттардың маңыздылығы белгіленген. Келіссөз барысында бірқатар мәселелерді талқыладық. Астана мен Санто-Доминго арасындағы саяси, сауда-экономикалық, инвестициялық, туристік және мәдени-гуманитарлық байланыстарды кеңейту жайы қаралды. Қос тарап сауда мен инвестициялардың көлемін арттыруға ниетті. Сонымен қатар, Доминиканға саяхаттап жүрген қазақстандықтардың қатары аз емес. Осы себепті, визалық режімді жеңілдету үшін келісім дайындалып жатыр, – деді Қайрат Әбдіраxманов. Кездесуде Доминикан Республикасының ЭКСПО-2017 көрмесіне қатысатыны бұл өз кезегінде екі ел арасындағы қарым-қатынастың нығая түсуіне септігін тигізетіні атап өтілді. Ал Доминиканның Сыртқы істер министрі кездесу барысында нақты құжаттарды рәсімдеуге мүдделі екенін мәлімдеді. – Біздің басты мақсатымыз – сауда-инвестициялық байланыстарымызды жаңа деңгейге шығару. Сонымен қатар, ЭКСПО-2017 көрмесінде ашылатын Доминикан Республикасының ұлттық павильонындағы жұмысқа белсене кірісетін боламыз. Осы арқылы қос мемлекет арасындағы сауда-экономикалық және іскерлік қарым-қатынас дами түседі, – деді Мигель Варгас. Айта кетейік, Қазақстан мен Доминикан арасындағы дипломатиялық қарым-қатынас 2011 жылы 7 маусымда орнатылған болатын. Доминикан министрі Астанаға алғаш рет ресми сапармен келіп отыр. Екіжақты сауда-экономикалық ынтымақтастық нәтижесінде ірі көлемде экспорт пен импорт жүзеге асты. Қазақстан кеден органдарының мәліметі бойынша, 2016 жылы сауда айналымы 890,3 мың долларды құрады. Бұл өткен жылдарғы көрсеткіштерден 1,5 есе көп. Нақтырақ тоқталар болсақ, сауда айналымы 2015 жылы 560,8 мың доллар, 2014 жылы 560,4 мың доллар, 2013 жылы 659,1 мың доллар сомасын құраған еді. Екіжақты қарым-қатынастар тариxында былтыр алғаш рет Қазақстаннан Доминиканға 211,6 мың доллар көлемінде экспорт жасалды. Ал оған дейін негізінен Доминикан импорты ғана тіркелген еді. Доминиканнан Қазақстанға импортталатын тауарларға пластмассалар, медициналық құрылғылар, табаны резеңкеден дайындалған аяқ киімдер, табиғи немесе композициялық былғары (жалпы импорттың 30%-ы), электр тізбектерін ажырату, ауыстырып қосу және қорғауға арналған электр аппаратуралары (10%) жатады. Ал Қазақстаннан Доминиканға фосфинат, фосфонат, фосфат және полифосфат экспортталады.
Аян ӘБДУӘЛИ, «Егемен Қазақстан»