Таңертеңгілік облыс әкімінің орынбасары Ұласбек Сәдібековтің қабылдауында болып, келелі әңгіменің желісін тарқатқан ақын-жазушылар «Отырар» кітапханасында болып, кітап көрмесімен танысты. Мәжіліс залында оқырмандармен жаймашуақ көңіл күйде өткен жүздесуді жергілікті жазушы Шойбек Орынбай жүргізіп, асқақ Алатаудың баурайынан келген қонақтарға сөз берді. Рухани кездесуге облыстық Қазақстан халқы Ассамблеясының жанындағы қоғамдық құрылымдардың жетекшілері, этномәдени бірлестіктердің төрағалары, зиялы қауым өкілдері, оқу орындарындағы «Достық» клубтарының мүшелері мен кітапхана оқырмандары қатысты. Алдымен сөз сабақтаған қаламгер-журналист, Қазақстан Республикасы Президенті сыйлығының лауреаты Мереке Құлкенов Елбасы мақаласын түсініп, түйсініп оқу үшін халқымыздың басынан өткен зұлмат жылдарды еске түсіру қажеттігін атап көрсетті. 1894 жылы патшалық Ресейдің жүргізген халық санағы мәліметі бойынша қазақ халқының саны 6 млн 480 мың болған екен. Арадағы бір ғасырдан астам уақытта қазақтың бар өскені 4 млннан сәл ғана асады. 40-50 млн болып жайқалып отыруға тиісті қазаққа қазақтан басқаның жаны ашымаған. Мемлекет басшысы Нұрсұлтан Назарбаев осыған байланысты «ұлтымызға адам айтқысыз демографиялық соққы жасалды, оның жарасы бір ғасырдан бері жазылмай келеді» деді. Дені сау ұрпақ өсіріп, демографиялық ахуалды түзетумен қатар, ұлттық құндылықтар жайында сөз еткен жазушы жаулап алған жерлерінен Самарқандқа кітап тасыған, үлкен кітапхана салдырған Әмір Темір көрегеннің өмірінен мысал келтірді. Ізгілікке апаратын жолдың руханиятты жаңғырту екендігін айтты. Ақын Аманхан Әлімұлы бұл бағдарламалық мақала Елбасының бұрынғы Жолдауларынан өзіне ыстығырақ екенін жеткізді. Өйткені, бұған дейін тұралаған экономиканы қалпына келтіру үшін руханиятты кейінге ысырып келдік. «Экономика – өңеш. Өңештен өткеннің бәрі – экономика», деп өткенді бір түйреген ақын Елбасы мақаласындағы «Сапаның ашықтығы» бөліміне айрықша тоқталды. Елбасының «егер қазақстандықтар жер жүзіне үйден шықпай, терезеден телміріп баға беретін болса, әлемде қандай дауыл соғып жатқанын көре алмайды» деген сөзін мысалға келтірген Аманхан ақын қазақтың өз қазанында ғана қайнауы ешқандай жақсылық әкелмейтіндігін қадап айтты. Әйгілі «Жібек жолы» сауда керуені әлеммен байланыс көзі болды. Сол сияқты әлем әдебиеті, мәдениет, өркениет игіліктерінен сыртқары қалуға болмайды. «Ұлы Мұхаң – Мұхтар Әуезов 1960 жылдары «Жыл келгенде жаңалық сезілер» деген мақала жазғанда ұлтымызға үлкен сілкініс туғызды. Елбасының бұл мақаласында да сондай сілкініс, риясыз сезім байқалады», деді, ақын, Қазақстан Республикасы Мемлекеттік сыйлығының лауреаты Есенғали Раушанов өз ойын осылай жұптаған ол мақаланың жүгін астананы Алатаудың етегінен Сарыарқаның төріне көшірген тарихи оқиғаның мәніне теңеді. Бірқатар жақсы пайымдауларымен бөліскен ақын қазақты етектен тартқан ескі сарқыншақтардан ең алдымен оңтүстіктің тазаруы керектігін сөз етті. Ақынның ойынша, оңтүстік − қазақ ұлтының ұйытқысы, қазақ ордасы. Игіліктер осы жерден басталуы заңды. Жазушы Жүсіпбек Қорғасбек те әріптестерінің руханият жөніндегі ойларын жалғады, келелі ұсыныстар айтты. Оқырмандармен ойлы кездесуді Оңтүстік Қазақстан облыстық Қазақстан халқы Ассамблеясы төрағасының орынбасары Мұратəлі Қалмұрадов қорытты. Түстен кейін жазушы Мереке Құлкенов Қырғыз Республикасына жол тартты. Қалған қаламгерлер «Қазақстан-Шымкент» телеарнасының «Ортақ шаңырақ» телебағдарламасына қатысқаннан кейін облыстық әдеп-ғұрып және салт-дәстүр орталығына, облыстық тарихи-өлкетану мұражайына барып, аталған мекемелердің жұмыстарымен танысты. Көрнекті ақын Тоқаш Бердияровтың туған інісіндей болып, тәрбиесін алған ақындар Есенғали Раушанов пен Аманхан Әлімұлы, содан кейін сырлы Созаққа жолға шықты.
Бақтияр ТАЙЖАН, «Егемен Қазақстан»
Оңтүстік Қазақстан облысы