«Қазақстан – Нидерландының халықаралық қауіпсіздік мәселелері жөніндегі аса маңызды серіктесі. ЭКСПО-2017 көрмесі жасыл энергетика тақырыбына арналып отырғаны белгілі. Біз бірлесе күш жұмылдыра отырып, осы салада озық шешімдерді табатынымызға сенімдімін», – деп атап өтті министр өз сөзінде. Сонымен қатар, Нидерландының ұлттық күніне орайластырылған басты шара Holland Innovation Challenge атты экологиялық байқауының қорытындысын жариялау болатын. Нидерландының ЭКСПО-2017 көрмесіне қатысуы аясында ұйымдастырылған бұл жастар жобасын толығымен елдің Сыртқы істер министрлігі қаржыландырғанын айта кеткен жөн. 2016 жылдың қазан айынан бастап 6 команда ЭКСПО-2017 тақырыбы аясында 4 нидерландылық компанияға арнап жаңа бизнес-тұжырымдамалар дайындау мақсатында жұмыс жүргізген болатын. Әр команда құрамында екі қазақстандық және екі нидерландылық студент бірлесе жұмыс атқарғанын атап өту қажет. Қазақстан тарапынан Нархоз университеті мен Қазақ ұлттық аграрлық университетінің студенттері, ал Нидерланды тарапынан Вагенинген университетінің (Wageningen), Утрехт университетінің (Utrecht university) және Гронинген университетінің (Groningen university) студенттері қатысты. Жоба Нидерландтың Кәсіпкерлікті қолдау жөніндегі агенттігімен (RVO) бірлесе отырып жүзеге асырылды. Нидерланд экономика министрі Хенк Камп жеңімпаз командаға жүлдені табыстап, қазылар алқасының таңдауына байланысты пікірін білдірді. «Қазылар алқасы Aquamotion командасының жұмысын бірнеше себептерге байланысты таңдады: біріншіден, команданың идеясы аса өзекті әрі ЭКСПО-2017 тақырыбына сәйкес келеді; екіншіден, олардың ұсынған тұжырымдамасы инновациялық жобаға жатады, олар дұрыс шешімді табу үшін талай мәселелерді зерттеп шығуы керек болды; үшіншіден, көтерілген мәселе, яғни таза ауыз суына қол жеткізу – әлеуметтік маңызға ие болғандықтан, қоғам мен ел азаматтары үшін аса қажет. Сол себепті біз байқау жүлдесін осы командаға табыстауды ұйғардық», – деп атап өтті министр.
Айдар ӨРІСБАЕВ, «Егемен Қазақстан»