Алматы – Ташкент тасжолының үстіңгі қапталына көлбей орналасқан Ақтерек ауылы Алматы облысының Жамбыл облысымен шекаралас жатқан іргелі елді-мекені. Мамыражай күйдегі таза қазақы ауылдың бүгінгі тыныс-тіршілігі, қам-қарекеті көз қуантарлық. Кезінде өтпелі кезеңнің қиыншылығын бастан өткергенмен, ауыл тізгінін Темірлан Шәйнүсіпов қолына алғалы жыртықтары жамалып, тесіктері бүтінделіп, табыстары еселеніп, бүгінде елдің еңсесі көтеріңкі, қазан-ошақ жоғары дегендей, тұрмыстары жақсарған.
Биыл Ақтерек жеке шаруа қожалығының еңбеккерлері бітік егін өсіріп, әр гектардан 15 центнерден астық жинап, қамбаларына 5 мың тонна бидай құйып алды. Егер Ақтерек өндірістік кооперативі құрылған 1994 жылы отыздай техника, ірі қара малдан екі бұқа, ал қой, жылқыдан тұқым қалмаса, бүгінде ауылдан 50 мыңға жуық қой, 6 мың ірі қара, 2,5 мың жылқы өріп шығады. Осы уақытқа дейін ауылдағы бір үйдің мұрты бұзылмаған. Қайта халықтың жағдайының жақсарғаны ғой, ауыл сыртынан жаңа көше түсті. Ең бір айта кетерлік жағымды жаңалық, Темірлан биыл жағдайы төмен қожалық мүшелеріне 12 жаңа үй салып, қоныс тойын тойлады. Қалғандарының үй, қора-жайын қоршап, көшенің сәніне сән қосты. Бұдан бірнеше жыл бұрын 3,5 мың га жерді қоршап 1,5 мың түп отырғызған алма, алмұрт ағаштары былтырдан бастап жеміс бере бастады. Жыл сайын қожалық мүшелеріне бау-бақша дақылдарын, 5 тонна көмірін, бидайын, жемін-шөбін тегін түсіріп береді. Ауыл аудан орталығынан 90 шақырым қашықта орналасқандықтан халыққа тұрмыстық қызмет көрсету саласы да оңтайлы ұйымдастырылған. Шаштараз, дәріхана, дүкен, стоматология кабинеті, мейрамхана, наубайхана, бильярд ауыл адамдарына қалтқысыз қызмет жасауда.
Әрине, ақтеректіктерге аудан, облыс әкімдіктері қашанда қолдау көрсетіп, көмектесіп отырады. Бұған дейін ауылдағы орта мектепті күрделі жөндеуден өткізсе, биыл облыстық бюджеттен бөлінген қаражатқа Жаманты көшесіне асфальт төселіп, тұрғындардың көңілі бір көтеріліп қалды. Бір ғана «әттегенайлары» ауыз су мәселесі толық шешімін таппай отыр. Былтыр облыс бюджетінен қомақты қаржы бөлініп, бір ұңғыма қазылса, қалғандарын және үйді-үйге су тарту жұмыстары келесі жылдың есебінен қарастырылмақ.
Ақырын жүріп, анық басатын Темірлан осы ауылда туып, өскен жігіт болғандықтан, жер жағдайын, ауыл тіршілігін өте жақсы біледі. Ауылда тұратын бесіктегі баладан еңкейген қартқа дейін бес саусақтай біледі, олардың әрқайсысының қам-қарекетінен, тұрмыс жағдайынан хабардар. Сондықтан да той-томалақ, өлім-жітімде, тұрмысы нашар отбасыларына қолынан келген көмегін беруден аянып қалмайды. Оның бұл қамқорлығын ауылдастары да бағалап, Ақтеректің бел баласы атанған Темірланға қашанда ризашылықтарын білдіріп жатқаны. Міне, осы төгілген тер, жасаған еңбек ескерусіз қалмай, қожалық төрағасы 2008 жылы «Құрмет» орденімен марапатталды. Ал ауылдастары болса алдағы уақытта жаңашыл да жігерлі басшысынан тағы да тың істер, жағымды жаңалықтар күтеді.
Гүлзейнеп СӘДІРҚЫЗЫ.