Мемлекет басшысының атына Оңтүстік Қазақстан облысы, Төле би аудандық түрік этномәдени бірлестігінің төрағасы Мухтазим Таировтан хат келді, деп хабарлады Қазақстан Республикасы Президентінің баспасөз қызметі.
Автор хатында сонау 30- жылдарда саяси қуғын-сүргінге ұшыраған талай ұлттың баласын бауырына басып, бір үзім нанын бөліп беріп, оларды ажалдан аман алып қалған, қиын-қыстау кезеңде пана болған кеңпейіл қазақ халқына алғысын айтады.
Одан әрі хатта былай делінген: «Ешкімді жатсынбайтын қазақ халқы ұлтаралық қарым-қатынасқа оң ықпал етіп, адамдардың өзара сыйластығы мен ынтымағын жарастыра түсті. Мұның нәтижесі еліміздің бүгінгі өмірінен айқын сезіледі. Сіздің салиқалы саясатыңыздың арқасында бірлігі жарасым тапқан Қазақ елінде қаншама этнос Тәуелсіздіктің туын желбіретіп, бір үйдің баласындай, бес саусақтың саласындай жақсы өмір сүруде. Сіздің бастамаңызбен құрылған Қазақстан халқы Ассамблеясы отандастарымыз арасындағы татулықты нығайтуға, қазақстандық қоғамды ортақ мақсатқа ұйыстыруға, ұлтаралық келісімді бекемдеуге бағытталған институтқа айналды. Ассамблеяның жемісті жұмысының нәтижесінде достығымыз берік, тұрақтылығымыз тұғырлы, ынтымағымыз жарасты елге айналдық.
Өзім тұратын Оңтүстік Қазақстан облысының, Төле би ауданында 40-тан астам этнос бейбіт өмір сүріп келеді. Ауданда түрік, славян, неміс, өзбек, корей, күрд этномәдени бірлестіктері жұмыс істейді. Олардың ана тілін, мәдениетін сақтауға және жаңғыртуға барлық жағдай жасалған».
Хат иесі одан әрі Президенттің басшылығымен еліміз зор жетістіктерге жеткенін айта келіп, Елбасына зор денсаулық, толайым табыс және бақ-береке тілейді.