Жыл басында «Егемен Қазақстан» республикалық газеті» акционерлік қоғамының ғимаратында Ресей Жазушылар одағының мүшесі Болат Шәкімовтің «Что там, за далью?» атты кітабының Астанадағы тұсаукесері болып өткен еді.
Тұсаукесер рәсіміне Ресейдің көрнекті қаламгерлері – Ресей Жазушылар одағы басқармасының хатшысы, «Российский писатель» газетінің бас редакторы Николай Дорошенко, Ресей Жазушылар одағы басқармасының хатшысы, проза жөніндегі кеңестің төрағасы Михаил Попов, Ресей Жазушылар одағы басқармасының хатшысы, «Алгоритм» баспасының бас редакторы Андрей Воронцов, «Наш современник» журналының проза бөлімінің меңгерушісі Евгений Шишкин арнайы келіп қатысқан. Ол жайында әріптесіміз Айгүл Сейілова «Қазақ жанының орыс тілді білгірі» деген мақала да («ЕҚ», 2011, 16 ақпан) жазған болатын.
Қазақстандық белгілі қаламгерлер, Парламенттің бір топ депутаттары қатысқан ол кездесуді ашқан «Егемен Қазақстан» республикалық газеті» акционерлік қоғамының президенті Сауытбек Абдрахманов кітап авторымен баспасөзге жазылу жайымен Батыс Қазақстан облысын аралаған сапарында танысқанын, оның «Наш современник» журналында жарияланған әңгімелеріне ерекше сүйсінгенін айтқан болатын. «Автор бізді Мәскеудің белді баспасынан шығарған қомақты кітабымен қуантып отыр. Болат Шәкімов кітабының Ресей Жазушылар одағының мәжіліс залында өткен тұсаукесерінде айтылған сөздер мерейіңді тасытады.
Атақты ақын, М.Шолохов сыйлығының лауреаты Людмила Щипахина: «Соңғы жылдарда оқыған кітаптарымның ішінде мені ең қатты толқытқаны Болат Шәкімовтің кітабы. Орыс тілінің алтын өрнегімен жазылған бұл кітаптың әр абзацы бірінен-бірі артық» деп сөйлеген. Ал академик Ю.Виноградов Б.Шәкімовке осы кітап үшін В.Пикуль атындағы халықаралық әдеби сыйлықтың дипломы мен алтын медальді табыс еткен. Көптеген жылдар бойы шаруашылық саласында, басшылық қызметтерде жүрген, соңғы кезеңде Тасқала, Бөрлі аудандарын табысты басқарып келе жатқан азаматтың көркем әдебиетте мұндайлық жарқын жетістікке жетуі бәріміздің ортақ абыройымыз», деген еді тұсаукесер рәсімінде С.Абдрахманов.
Автордың әдебиет әлеміндегі жеңісті жолы жалғасып жатқаны қуантады. Жақында қазақстандық прозашыға Ресей Жазушылар одағының «Традиция» әдеби сыйлығы табыс етілді. Әдеби ортада өте жоғары бағаланатын бұл сыйлық орыс классикалық әдебиетінің асқақ дәстүрлерін орнықтыруға және дамытуға көрнекті үлес қосқан қаламгерлерге беріледі.
Сыйлықты тапсыру рәсімінде Ресей Жазушылар одағының төрбасы Валерий Ганичев Болат Шәкімов шығармаларының мінсіз бейнелеу мәдениетін, оның кейіпкерлері мінезделуінің тереңдігі мен нағыз халықтығын айрықша атап өтіпті. «Орыс әдебиетіндегі Распутин, Белов сынды айтулы жазушылар сияқты, сіз де қоғам алдына қарапайым еңбеккерлердің, село тұрғындарының әлеуметтік тұрғыдан ғана емес, адамгершілік тұрғыдан да жанын сақтап қалу проблемасын қойып отырсыз. Біздің адамдық қоғамдастығымызға тап осы руханият пен парасаттылық жағынан басты қатер төніп тұрған қазіргідей шақта бұл ерекше маңызды», деп атап айтқан В.Ганичев.
Интернеттегі «Издательский дом «Российский писатель» сайтына салынған мақалада Ресей көрнекті қаламгерлерінің қазақ жазушысының кітабына байланысты айтқан пікірлері біздің әрқайсымызды ұлттық мақтаныш сезіміне бөлеуге лайықты. Олардың кейбірін келтіре кетейік.
«Болат Шәкімов кітабының құндылығы оның елмен бірге ең бір күрделі дәуірді бастан кешкен адамның өмір тәжірибесін сығымдалған күйде көрсетуінен танылады» (Михаил Попов).
«Бұл прозада ақылды болып көрінуге тырысу жоқ, мұнда өмір бар, адамдар бар» (Андрей Воронцов).
«Автордың мәтіні жанға жайлы, байсалды, терең мәнді. Ресейдегілер қазақстандықтардың жан жүрегінде не болып жатқанын жақсырақ біле түсуі үшін оның алда да қалам тарта беруі керек» (Геннадий Иванов).
«Орыс тілі бізді біріктіреді. Мен Шәкімовті Ресейде прозасы үшін ғана емес, орыс тілінің сұлулығын танытқаны үшін де мойындағаныма қуаныштымын» (Ямиль Мустафин).
«Шәкімов Ресей мен Қазақстан халықтарын ортақ мәдени кеңістікке біріктірді. Мәскеу Болат Шәкімовті біздің орыс әдебиетінің алдыңғы қатарлы жазушысы деп таныды. Мен Қазақстанда болып, кітаптың қалай, қандай көңіл-күймен жазылғанын сезінгенімде көп нәрсені өзім үшін анықтадым. Бұл кітап – орыстың ғажайып прозасы. Сонымен бірге, маған, орыс оқырманына, Болат қазақ халқының жан дүниесін ашып көрсетті. Сөз жоқ, ол қазақтың ұлттық жазушысы» (Николай Дорошенко).
Бұл сөздерге түсініктеме жасап жату артық болар. Біз осынау тамаша табысты қазақ руханиятының бүгінгі бір биігі деп бағалауға тиістіміз.
Қарашаш ТОҚСАНБАЙ.