«Нұр Отан» ХДП-ның Орталық аппаратында партия Төрағасының бірінші орынбасары Нұрлан Нығматулин жаңа тағайындалған Конрад қорының Қазақстандағы өкілі Амос Хелмспен кездесті.
Кездесу барысында екі тарап та біздің еліміз бен Германия арасындағы екіжақты ынтымақтастықты одан әрі дамыту үшін партияаралық пікір алмасуды жетілдіруді мәлімдеді.
Конрад Аденауэр атындағы қордың саяси маңызы бар. Оның негізгі көзқарасы ГФР-дағы жетекші партиялардың бірі – Христиан-демократиялық одағымен үндес. Бұл партия «Нұр Отан» партиясымен біраз уақыттан бері әріптестік қарым-қатынаста. Қормен тығыз ынтымақтастық негізінде Азия елдері саяси партияларының халықаралық бас ассамблеясының бесінші конференциясы өткізіліп, онда «Нұр Отан» төраға болып сайланды. Алқалы басқосу барысында Астана декларациясы қабылданып, онда Мемлекет басшысының негізгі сыртқы саясаттағы бастамалары көрініс тапты.
Жүздесу барысында еліміз тәуелсіздік алған 20 жылдағы жетістіктеріміз сөз болды. Нұрлан Нығматулиннің айтуынша, елімізде демократиялық қайта құрулар барысында Президент – партия Төрағасы Нұрсұлтан Назарбаевтың жеке өзі үлкен рөл атқарды. Қор төрағасы Қазақстан Президентінің әлемдік қоғамдастықтағы беделінің жоғары екендігін айырықша атап өтті.
Нұрлан Нығматулин мен Амос Хелмс еліміздегі саяси және экономикалық үдерістер төңірегінде пікір алмасып, шетелдердегі саяси партиялармен, халықаралық ұйымдармен бірлескен жобалар және ынтымақтастық жайында ой бөлісті.
«Егемен-ақпарат».