Астанада бұқаралық ақпарат құралдарына арналған «Astana Media Week» апталығы өтті.
Іргелі жиынға еліміздің түкпір-түкпірінен ақпарат майданының майталмандары мен танымал тұлғалар қатысты. Апталық барысында медиа саласындағы маңызды мәселелер талқыланып, түрлі ұсыныстар жасалды.
Апталық аясында ұйымдастырылған «Контент-Маркет» деп аталатын арнайы сессия кезінде 15 қазақстандық, 7 шетелдік телеарна мен 90 продакшн-компанияның өнімдері таныстырылды. Бұдан бөлек, апталықтың алғашқы күні «Астана PR күні» атты конференция өтті. Жиын барысында PR трендтер және коммуникация векторының өзгеруі сөз болды. PG Communications компаниясының бас директоры және Қоғаммен байланыс жөніндегі ұлттық ассоциация кеңесінің төрайымы Әсел Қарауылова коммуникацияны дамытуды жүйеге түсіру керек екенін тілге тиек етті. Оның айтуынша, мұндай жиындар PR мамандар мен баспасөз хатшыларының кәсіби деңгейін көтереді. Конференцияда тайм-менеджмент, эмоциялық күйіну және KPI көрсеткішін көтеру секілді коммуникация саласының маңызды тақырыптары төңірегінде ауқымды пікірталас өтті.
Жиынның екінші күнінде де бірқатар маңызды басқосулар өтті. Astana Digital Forum деп аталатын шарадан басталған күн бұқаралық ақпарат құралдары журналистерінің біліктілігін арттыруға арналған семинарлармен жалғасты.
Форумда цифрлы технологияларға қатысты күн тәртібінде тұрған бірқатар мәселелер сөз болды. Қазіргі таңда цифрлы технологияның жағдайын бағамдау өте қиын. Қазақстан тарапының осы жаһандық үдеріске ілесуі және ондағы келелі мәселелерді талқылауы еліміздің бағыты дұрыс екенін көрсетеді. Шалғай ауыл тұрғындарының цифрлы технологияға еркін қол жеткізуі бәсекеге қабілетті болуға мүмкіндік береді. Жиын барысында 2021 жылға қарай тағы екі миллион тұрғын интернетке қосылатыны айтылды.
Іс-шарада мемлекеттік тілге қатысты мәселелер де сөз болды. Қазақша Уикипедияның негізін салушы Нұртай Әшімнің сөзіне сүйенсек, биыл ана тіліміздегі контентке сұраныс көбейген. Сондықтан ғаламтордағы қазақша материалдарды көбейту уақыт күттірмейді. Н.Әшімнің айтуынша, кейінгі уақытта ана тіліміздегі Уикипедияны оқитындар саны 35 пайызға көбейген.
Қазақ тіліндегі контентті көбейту мәселесі апталықтың алғашқы күні де сөз болды. «Астана» арнасының бас директоры Ләззат Танысбай әріптестерін ана тіліміздегі өнімдерді көбейтуге шақырды. Оның пікірінше, қазіргі таңда қазақша өнімге сұраныс жоғары. «Болашақ» корпоративті қорының директоры Динара Шәйжүнісова да Шоқан мен Абайдың тіліндегі материалдарды көбейту керек деп есептейді. Оның сөзіне сай, Disney секілді алпауыт компаниялардың өнімдерін қазақ тіліне аударып, отандық телеарналардан көптеп көрсету керек.
Медиаапталық аясында қазақ тілді бұқаралық ақпарат құралдарына арналған біліктілік семинарлары өтті. Екі бөліктен құралған шарада ақпарат тексеру, жаңа медианың тиімді құралдары және конвергенттік журналистика секілді мәселелер төңірегінде сөз болды.
Біліктілікті арттыруға арналған семинарда журналистерге керекті бірқатар көмекші құралдар таныстырылды. Медиа тренерлердің сөзіне сүйенсек, Google компаниясының өнімдері медиа саласының мамандарына өте қажет. Сондай-ақ іс-шара барысында журналистердің жалған ақпаратқа қарсы қалай күресуі керек екені де айтылды. Youtube, Google секілді сайттарды пайдаланып, фейк жаңалықпен күресудің жолдары таныстырылды.
Апталықтың соңғы күні өңірлік бұқаралық ақпарат құралдарының форумы өтті. Жиынға Ақпарат және коммуникациялар министрі Дәурен Абаев пен Мәжіліс депутаты Сауытбек Әбдірахманов қатысты. Еліміздің түкпір-түкпірінен келген журналистердің жиынында министр «Astana Media Week» секілді көлемді шараның еліміздегі медиа саласын дамытатынын атап өтті. Сонымен қатар ведомство басшысы БАҚ саласында атқарылып жатқан бірқатар жұмыстарға тоқталды. Оның айтуынша, қазіргі таңда республикалық және өңірлік бұқаралық ақпарат құралдарының өзара әріптестік орнатуы жаңартылмақ. Соған сәйкес аймақтағы медиа құралдары республикалық әріптестерінен емін-еркін материал алмаса алады.
Форум барысында аймақтық БАҚ-тарға және журналистика саласының күн тәртібіндегі мәселелері айтылды. «Qazaqstan» телеарнасының басшысы Ерлан Қарин телеарналар мен интернет құралдары арасында аудиторияға тартыс жүріп жатқанын сөз етті. «Болашақ жастар» газетінің редакторы Дәурен Бабамұратов интернет сайттары рейтинг пен сенсация қуалап, ақпараттың негізгі бөлігі назардан тыс қалғанына тоқталды. Ол аталған сайттардың басшылығын осы мәселеге назар аударуға шақырды.
Апталықтың қорытындысы ретінде елдегі бірқатар баспасөз қызметі марапатталды. Осыған сай «Ең үздік баспасөз қызметі» аталымы бойынша Инвестициялар және даму министрлігі топ жарды. Ал жергілікті атқарушы органдар арасынан Батыс Қазақстан облысының баспасөз қызметі ең үздік деп танылса, компаниялар арасында «Қазақстан темір жолы» акционерлік қоғамының асығы алшысынан түсті. Корпоративтік сайттар арасында Астана қаласы әкімінің баспасөз қызметі озық шықты. «Кәсіби мойындалу» аталымында Ішкі істер министрлігі Төтенше жағдайлар комитетіне тең келер ешкім болған жоқ. Сыртқы істер министрлігінің баспасөз хатшысы Әнуар Жайнақов жылдың ең үздік баспасөз хатшысы деп танылды.
Апталыққа қатысқан мамандар мұндай іс-шараның қатысушыларға озық тәжірибелермен танысып, шеберлік шыңдауға және жаңа технологияларды ел игілігіне пайдалануға берілген үлкен мүмкіндік екенін сөз етті. Сонымен қатар жиынның медиа саласындағы серіктестік қатынастар мен халықаралық ынтымақтастықты дамытуға елеулі үлес қосатынына сенім білдірді.
Абай АСАНКЕЛДІҰЛЫ, «Егемен Қазақстан»