Магнитудасы 7,2 балл болған жер сілкінісінен зардап шеккен түріктің Ван провинциясына Қазақстаннан гуманитарлық көмек артқан ұшақ келіп жетті, деп хабарлады Қазақстанның Түркиядағы елшілігі.
Қазақстан Президенті Нұрсұлтан Назарбаев Түркия Президенті Абдулла Гүлмен телефон арқылы сөйлесіп, көптеген адамдардың қаза табуына және ғимараттардың құлауына әкеліп соқтырған Түркиядағы жер сілкінісіне байланысты Қазақстан халқы және өз атынан көңіл айтқан еді. Сондай-ақ Қазақстан Президенті сұрапыл апаттан зардап шеккендерге Қазақстанның көмек және қолдау көрсетуге әзір екендігін білдірген болатын.
Президент Н.Назарбаевтың тапсырмасы бойынша 27 қазанда Қазақстан Республикасы Төтенше жағдайлар министрлігінің арнайы ұшағы Түркияның зиян шеккен аймағына ең қажетті гуманитарлық жүктен тұратын, оның ішінде 600 орындық 60 қыстық шатыр, 60 жылытқыш пеш, 300 көрпе, 300 матрас, азық-түлік және т.б. заттарды жеткізді.
Жер сілкінісінен зардап шеккендер үшін гуманитарлық көмек тиелген қазақстандық ұшақты Ерзурум әуежайында Қазақстанның Түркиядағы елшісі Ж.Түймебаев және провинцияның басшылары қарсы алды.
Гуманитарлық жүкті түрік тарапына тапсыру барысында Ж.Түймебаев Қазақстан Президенті Н.Назарбаевтың түрік халқына және басшылығына деген жылы демеу сөздерін және шынайы күйзелісін жеткізді.