Былтыр Қазақстан мен Германия арасындағы дипломатиялық байланыстың 25 жылдығына орай екі елдің рухани өмірі мен мәдениетін тоғыстыруға бағытталған бірқатар танымдық шаралар өткен еді. Сол игі дәстүрдің жалғасы ретінде Ә.Қастеев атындағы Мемлекеттік өнер музейінде «Тілдің күші халықтарды қалыптастырады. Ағайынды Гриммдердің өмірі мен шығармашылығы» атты ерекше көрме алматылық көрерменге ұсынылды.
Ағайынды Гриммдер тек неміс еліне ғана емес бүкіл Еуропаға, одан қалса Батыс елдеріне танымал тұлғалар. Олардың шығармашылығы әлемдік мәдениеттің жауһары саналады. Якоб және Вильгельм Гриммдер – романтизм дәуірінде пайда болып, оның гүлденген шағында өмір сүрген, германистиканың негізін салушылар. Өз халқын жақсы білуге деген құлшынысы, ауыз әдебиетіне, халықтық тіл мен мәдениетке ықыластарының оянуы – соның көріністерінің бірі. Ағайынды Гриммдер Германиядағы ұлттық біртектестік пен тілдің дамуына зор үлес қосты. «Халық поэзиясы» мен «халықтық тілдің» маңыздылығына баса мән бере отырып, олар көптеген халықтардың ұлттық рухының өркендеуіне мүмкіндік туғызды. Олардың шығармашылығы неміс және Еуропа мәдениетіне едәуір ықпал етті. Көрмеге қойылған «Қызыл телпек», «Күлбикеш» және «Ұйқыдағы ару» сияқты әлемге әйгілі жекелеген ертегілерге жасаған иллюстрациялар – осының айқын мысалы.
«Тіл мен композицияның ерекшеліктерін сақтай отырып, ағайынды Гриммдер неміс ауыз әдебиеті ертегілерінің ерекшеліктерін жеткізіп, оларға көркем әдебиетке тән сипат берді. Желілік оқиғалардың қарапайымдылығы мен айқындығы және мазмұнның тереңдігі – Гриммдер ертегілерінің айрықша қасиеттері. Олардың «Бремен музыканттары» әр заманда елдерді аралап, саяхаттарын жалғастырып келеді. Аталған көрме Кассель қаласындағы «Ағайынды Гриммдер қоғамы» ҚҰ басқарушы директоры, доктор Бернхард Лауэр мырзаның басшылығымен ұйымдастырылып отыр. Көрме жұмысы үш ай бойы жалғасатын болады», дейді Мемлекеттік өнер музейінің директоры, профессор Гүлмира Шалабаева.
Көрменің ашылу салтанатына арнайы келген Германияның Қазақстандағы елшісі Рольф Мафаэль осынау ғажайып өнер туындылары Қазақстан мен Германия арасындағы достық қарым-қатынасты одан әрі нығайтып, рухани байланыс орнатуға жол ашатынын жеткізді. «Қазақстан мәдениеті мен тарихы бай мемлекет. Бұл елде өнер өте жоғары бағаланады. Астанадан басталған бұл көрме Қазақстанның рухани орталығы саналған Алматыға да келіп отыр. Әлемдік шығармалар халықтың ыстық ықыласына бөленеді деп сенеміз», дейді Рольф Мафаэль.
Сондай-ақ көрменің ашылуына келген Бас консул Йорн Розенберг пен «Ағайынды Гриммдер қоғамы» ҚҰ басқарушы директоры, доктор Бернхард Лауэр бұл өнер туындылары адамзат тарихындағы ерекше маңызға ие жәдігерлер екенін, көрменің жас көрермендеріне үлкен әсер сыйлайтынын айтып өтті. Шынында да көрмеге қойылған әр картинаға үңілгенімізде бала кезімізде оқыған таңғажайып ертегілер әлемінде саяхаттап жүргендей әсерге бөлендік.
Таңсық ертегілердің таңғажайып әлемі...
Арман ОКТЯБРЬ,
«Егемен Қазақстан»
АЛМАТЫ