Құралай ұсынған қағидалар

Танымал психолог, алты ба­ла­ның анасы Құралай Ошақ­баева көптен бері қазақ әйел­де­ріне арнап түрлі семинар өт­кізіп келеді. Әлеуметтік же­ліл­ерде Құралайдан мыңдаған қыз-келіншек қиындықтан құ­тылудың, бақытты болудың жолын сұрап жатады. Ол тұрмыстың тауқыметін кешіп жүрген барша қазақ әйелі жарастықты ғұмыр кешіп, тату-тәтті өмір сүрсе дейді. Ол ұсынған қарапайым қағи­далар еңбекқорлыққа, қоршаған ортаны жақсы көруге, ізгілікті қарым-қатынасқа шақырады.

Күн тәртібі

Адам аймен ұйықтап, күнмен оянуы керек. Түске дейін төсегі жиналмай жатқан әйелдің жеке өмірі де жинақы болмайды. Өзіңді ретке келтіру үшін күн тәртібіне қойылатын талаптарыңыз мықты болғаны жөн. Таң атып, күн шық­қан сәтте үйдің күні – әйел де оянып, ерте тұрғаны дұрыс. Са­ғат түнгі он бірден кешікпей ұйық­тау адамның физикалық, психологиялық саулығына өте пай­далы. Бұл анау айтқандай ғылыми жаңалық емес, қа­ра­пайым ғана табиғат заңы. Күн тәр­тібі мен ұйқы дұрыс болмаса, соңы жалқаулық пен салақтыққа ұласады.

Жақсы сөз – жарым ырыс

Адам құлағы жақсы дыбыс­тарға үйір болғаны дұрыс. Жақсы әңгіме, жақсы ән-күй тыңдау арқылы адам ағзасы тазаланады. Өсек-аяңға үйірсектіктен қара күштердің ықпалына оңай еріп кетуі ғажап емес. Отбасыңа, жұ­мысқа, жеке әуестігіңе назар бөлу үшін қаншама күш-қуат қажет. Ал ізгілікке бағышталған дүниелерді оқып, көру, айту арқылы ішкі қуатыңыз арта түседі. «Басымды ауыртпашы», «Миымды ашытпашы» деген сияқты ауызға қалып болып кет­кен сөздерді жүрдім-бардым ай­та салудан аулақ болу қажет. Осы­дан соң басыңыз, я миыңыз ауырып жатса таңғалмаңыз. Жақ­­­­сы сөз жанды жадыратады. Ауыз­дан шыққан сөздің энер­гетикасы ұрпақтан-ұрпаққа жал­ғасатын дүние. Мұндай таным қазақ халқының дәстүрінде де сақталған. Аруақты сыйлау, ата­дан қалған мирас, сөз киесі, қар­ғыс ұғымдарының негізгі мәнісі осында жатса керек.

Жомарт болу

Ғаламдық күштердің бұлжы­мас ережесі – жомарт болу. Қа­йы­рымдылық қылу, қолыңда бар­мен бөлісу байлық пен сәт­тілікке бастайтын жол. Жол жү­ру ережесі сияқты ғаламның да қалыптасқан қағидасы бар. «Ала­ған қолым береген» деген. Жо­марттық пен жанашырлық, мейір­бандық шынайы игілікке, ізгілікке бағытталуы тиіс. Әй­гілі әл-Фараби бабамыздан «Жомарттық деген не?» деп сұ­ра­ғанда, «Ол – ысырап пен сараң­дықтың ортасы»,  деп әдемі жа­уап берген екен.

Дайындаған Ая ӨМІРТАЙ,

«Егемен Қазақстан»