Газеттің кешегі нөміріне суыт жолдаған мақаламызда Жетісу жеріне жауған мол жаңбыр тоңы жібімеген жерге сіңбеуінен сел қаупін туғызғанын жазған едік. Қатер әлі сейілген жоқ. Алты мыңнан астам адам сел қаупінен тыс жерлерге көшірілгенінің өзі апаттың аумағын аңғарта алады.
Кеше облыс әкімі С.Үмбетов Іле ауданындағы Ақши селосына келіп, жұртшылықпен жиналыс өткізді. Тосын табиғаттың аяқ астынан туындатқан қатеріне орай кезекті еңбек демалысын үзіп, қиындықта қалған елдің арасына тез жеткен Серік Әбікенұлы халыққа атқарылып жатқан жұмыс жайында жүйелі әңгімелеп берді. Сел қаупі төнген жерлердегі тұрғындар ағайындарына, көршілес елді мекендерге, сондай-ақ аудандық ауруханаға орналастырылған. Таяу арада шатырлы қалашық орнатылады. Азық-түлік жедел жеткізіліп жатыр. Іле ауданындағы геологиялық-барлау пунктінің ғимараты қалпына келтірілді. Бұл жерге 300 ұйықтайтын қапшық, 300 жиналмалы төсек жеткізілді, 38 тонна бензин мен 39 тонна дизель отыны берілді. Бөгеттің бас жағынан суды шақтап төменге жіберу ұйымдастырылуда. Облыстың Жамбыл, Ескелді аудандарында, Қапшағай қаласының маңайында да осындай су қатері бар. Жамбыл ауданында еріген қар суы Тарғап бөгетіне қарай жөңкіле ағып, бөгетті бұзып кететіндей қауіп төнді. Соған байланысты Тарғаптың төменгі жағында тұратын 200-дей адамды көшіру жөнінде шешім қабылданды. Мұнда су алған 50 үйдің 3-іне зақым келген, бір үй апатты жағдайда тұр.
Алматы – Бішкек тасжолының бір учаскесін де су басып қалды. Қапшағай – Балқаш – Қарой айналмалы жолындағы жағдай да осындай. Төтенше жағдайдың салдарларын жоюға қолда бар күш толық жұмылдырылуда.
Панфилов, Ұйғыр аудандарынан жеткен хабар бойынша, ондағы судың деңгейі біршама қалыпқа түскен, қауіп азайған көрінеді.
Күмісжан БАЙЖАН, Алматы облысы.