Тәуелсіздік тудырған таланттар

Димаштың дара дауысы дүниені дүр сілкінтіп, жаһанның жаңалығы болғанына көп уақыт өте қойған жоқ. Осы аз ғана уа­қыттың ішінде әлемдік дең­гейде құбылысқа айналған дарынның өнердегі ең алғаш тұсауын кес­кен елеулі оқиға – 2015 жылы Витебск қаласында өткен XXIV Халықаралық эстра­далық ән орындаушылардың «Славян базары-2015» байқауы. Байқаудың Гран-приін жеңіп алған айтулы сәт әнші өміріне өзінің үлкен өзгерісін де қоса ала келді. Әйт­кенмен, одан кейін де талай ән байқауларында топ жарып жүрген талантты жаһан танып, атағы шартарапты шарлаған тарихи сәт Димаштың Қытайда өткен «I am a singer» жобасындағы жұлдызды өнер көрсетуінен кейін тіпті өршіді. Бүгінде Димашты танымайтын ел кем де кем. Өткенде ғана әншінің Лондон қаласында қазақ тілінде өткен концертіне ине шаншар орын қалдырмай жиналған ағылшын жұртының әнге, Димаш өнеріне деген ыстық ықыласы – тұтастай қазақ ұлтына деген құрмет пен бас июді біл­дірсе керек. 

Димаштың өнердегі жаңа­лығын жалғап, өкше басып келе жатқан інісі Рахат-Би Әбдісағин есімі де бүгінде музыкадағы әлем таныған феноменге айналып үлгерді. 10 жасында жаңалық жасап, алғашқы классикалық туындысын өмірге әкелген әлемдегі ең жас кәсіби композитор Рахат-Би Әбдісағин есімімен қазақ елі Мемлекет басшысы Нұрсұлтан Назарбаевтың «Рухани жаң­ғыру» бағдарламасы аясында жү­зеге асқан «Қазақтың 100 жа­ңа есімі» жобасы барысында етене танысты. Жоба же­ңім­паздарын құттықтауға ар­налған салтанат­ты жиында Елба­сы жас дарын­ның теңдессіз шы­ғар­машылық қабілетіне тәнті болып, өрімтал талант өнерін әйгілі Моцарт шығармаларымен тең қоя таңданғанын сол сәтке куә болғандар әлі ұмыта қойған жоқ. 

Иә жаһан назарын өзіне аудартқан өнер иесінің шексіз таланты бүгінде шартарапқа танылып, туындылары әлемнің айтулы сахналарын мойындатып үлгерді. Әлі 20-ға да толмаған музыкант бүгінге дейін симфониялық оркестрге және әр жанрдағы камералық ансамбльдерге арналған 100-ден аса классикалық музыкалық туындының авторы. 

Ал кино әлемінде 2018 жыл­дың үздігі атанған Самал Есля­мованың орны айрықша. Ма­мыр айында Францияның Канн қаласынан жеткен «Самал – үздік актриса» деген ақжолтай хабар төрткүл дүние назарын қазақ еліне бұрғызса, араға аз уақыт салып Түркияның Анта­лия қаласында өткен 55-ші Ха­лық­аралық кинофестивалі де режиссер Сергей Дворцевойдың «Айка» фильміндегі рөлі үшін талантты актрисаны үздік деп таныды. 

Сонымен қатар қазақ өне­рінің ғана емес, есімін дүние жү­зі таныған классикалық музыка майталманына айнал­ған Алан Бөрібаевтың дирижер тұғырындағы табыс­ты ізденісі де бүгінде жер жа­һан­ды таңғалдыра таңдай қаққы­зып келеді. 2003-2007 жылдары Астана Мемлекеттік филар­мониясы симфониялық оркес­трінің бас дирижері, 2004-2007 Майнингеннің (Германия) бас музыка директоры, 2007 жылы Норрчёпинг симфониялық ор­кестрін (Швеция), 2007 жы­лы нидерландтық Брабант оркес­трін, ал 2009 жылдан бастап Ирландияның Ұлттық сим­фо­ниялық оркестрін басқарған Алан Бөрібаев қазіргі таңда «Астана Опера» мемлекеттік опера және балет театрының бас ди­рижері қызметінде. Әйгілі маэстроның шығармашылық қиялына қанат бітірген Л.Хамиди мен А.Жұбановтың әйгілі «Абай» операсы жаңа заман тілінде көрерменге жол тартқан болатын. Әлемге қазақ ұлттық опера өнерін әйгілеп жүрген айтулы туынды биыл Мемлекеттік сыйлықтың лауреаты атанды. 

Сол секілді бүгінде опера өне­рінің әлем мойындаған жарық жұлдызына айналған Сүндет Байғожин, 27 жасында еліміздің бас оркестрі – 85 жылдық тарихы бар Құрманғазы атындағы Қазақ мемлекеттік академиялық ұлт аспаптар ор­кестрінің бас дирижері қыз­метіне тағайын­далып, жа­қын­да ғана Құрманғазы атын­да­ғы Қазақ ұлттық кон­сер­­ва­то­риясының ректоры қыз­метіне кіріскен Арман Жү­дебаев сынды жалынды жастардың өз саласының кәсіби білікті ма­маны атанып қана қоймай, өнер әлемінде жаһан таңдана қа­райтын жаңалық тудыруға деген ұмтылысы мен жеңісі қай кезде де ұлтымыздың мақ­та­нышы һәм абыройы.

Бұл да болса қа­сиетті тәуелсіздігіміз тудыр­ған талантты жастардың шы­ғар­машылығына қанат байлап, үне­мі шабытқа бөлеп келе жат­қан еңселі елдігіміз екені сөзсіз.

Назерке ЖҰМАБАЙ, 

«Егемен Қазақстан»