Арал теңізі күні А.Тоқмағамбетов атындағы Қызылорда қалалық мәдениет үйінде «Тұран тұнығы – Арал» тақырыбымен аталып өтті.
2017 жылы облыс әкімдігі мен халықаралық Аралды құтқару қоры ұйымдастырған халықаралық тұрақты даму форумында қордың құрылған күніне орай 26-шы наурыз - Арал күні болып қабылданған болатын. Жиында халықаралық қордың Қызылорда филиалының өкілі Ибрагим Әлиев әлемдік проблеманың салдарын жою жөніндегі Орталық Азия мемлекеттерінің күш-жігерін үйлестірудегі ұйымның роліне ерекше тоқталды. Қор жұмысын бастағалы бері экологиялық тұрғыдан сауықтыру және әлеуметтік-экономикалық түйткілді тарқату бағытында көптеген бағдарлама жүзеге асырылды. Қазақстан Дүниежүзілік банктің қолдауымен теңіздің солтүстік бөлігін қалпына келтірді.
– Үкіметтің, халықаралық ұйымдардың, қаржы ұйымдарының Арал өңірінің экологиялық, әлеуметтік мәселелерін шешуге арналған түрлі жобалары мен бағдарламаларын түгел тізіп шығу мүмкін емес. Жағдайды жақсарту мақсатында қолға алған шараларды әлі де жалғастыра береміз, – деді И.Әлиев.
Салтанатты жиында «Ақмешіт» фольклорлық ансамблі, «Тұран» триосы және өзге де жергілікті өнерпаздар Арал тақырыбындағы ән-жырымен көпшілікке шашу шашты.
Бақтияр ТАЙЖАН,
«Egemen Qazaqstan»
Қызылорда облысы