Испания Королі Фелипе VI Қазақстанның қалыптасуы мен дамуындағы Нұрсұлтан Назарбаевтың қызмет нәтижелерін айрықша атап өтеді.
«Мен сіздің бүгінде заманауи, әлеуметтік және көпконфессиялы болып отырған мемлекет құрудағы бар күш-жігеріңізді бағалаймын, сондай-ақ Сіздің Ұлы еліңіз бен Испания арасындағы қарым-қатынастарға қосқан ерекше үлесіңіз үшін алғыс айтқым келеді», делінген жеделхатта.
Монако князі II Альбер Нұрсұлтан Назарбаевқа оның Қауіпсіздік Кеңесінің төрағасы, Nur Otan партиясының төрағасы және Елдің Конституциялық кеңесінің мүшесі ретіндегі қызметіне табыс тілейді.
«Осы сәтті пайдалана отырып, мен біздің ынтымақтастығымызды жоғары бағалайтынымды айтқым келеді және Монако княздігі мемлекеттеріміздің арасындағы қарым-қатынасты толық қолдайтынына, оның одан әрі тереңдеуіне мүдделі екеніне сендіремін», – деп жазады Монако Князі.
Армения Республикасының Президенті Армен Сарксян Елбасының Қазақстан мен Арменияның арасындағы одақтастық байланыстарды дамыту мен нығайтуға қосқан елеулі үлесіне тоқталады.
«Сіз бүгінгі қарқынды дамып келе жатқан, қуатты экономикасы, қалыпты әлеуметтік қарым-қатынастары, көп ұлтты елінің тату әрі ынтымақты халқы бар, озық білім мен тәрбие алып жатқан жастары туған елінің болашағына сеніммен қарайтын, оны әлемге лайықты әрі мақтанышпен таныстыратын Қазақстанның жылнамасын өзіңіздің дана шешіміңіз арқылы бастаушы әрі авторы құқығымен жазуды жалғастырудасыз», делінген хатта.
Финляндия Республикасының Президенті Саули Ниинистё өзінің жеделхатында Нұрсұлтан Назарбаевтың Қазақстан Республикасының Президенті лауазымында болған кезеңде екіжақты мемлекетаралық қарым-қатынастар теңдессіз жоғары деңгейге жеткеніне айрықша мән берген.
«Сіздің белсенді әрі көп қырлы қызметіңіз қазіргі Қазақстанның қалыптасуы мен дамуында шешуші мәнге ие болды. Осы бағыттағы ғажап табыстарыңызға байланысты менің құттықтауымды қабыл алыңыз», деп атап өтеді С.Ниинистё.
Өз жеделхатында Ресей Федерациясы Үкіметінің төрағасы Дмитрий Медведев Қазақстан Республикасының Тұңғыш Президентінің тарихи еңбегін атай отырып, Нұрсұлтан Назарбаевтың Қазақстан Президенті лауазымында болған кезеңдегі өзара жемісті іс-қимыл үшін ризашылығын білдірген.
«Сіздің Қазақстан мен Ресейді байланыстыратын достық, серіктестік және одақтастық қарым-қатынастарды нығайтуға ұдайы көңіл бөліп отырғаныңызды айрықша атап өткім келеді. Барлық мүше мемлекеттердің игілігі үшін табысты дамып келе жатқан Еуразиялық экономикалық одақты құрудағы көшбасшылық рөліңізді жоғары бағалаймыз», делінген жеделхатта.
АҚШ Мемлекеттік хатшысы Майкл Помпео Елбасы Нұрсұлтан Назарбаевтың Қазақстанның қалыптасуы мен гүлденуіндегі шешуші рөлін атап өткен.
«Америка Құрама Штаттары Қазақстанмен жақын ынтымақтастыққа әрдайым мән береді, сондай-ақ Сіздің ел басшысы лауазымындағы және әртараптандырылған, ашық, нарықтық экономикалы Қазақстанды құру жолындағы табыстарыңызды жоғары бағалайды», делінген хатта.
Дүниежүзілік сауда ұйымының Бас хатшысы Роберто Азеведо Нұрсұлтан Назарбаевтың елдің өсуі мен экономикалық дамуындағы, соның ішінде халықаралық саудаға белсене қатысу арқылы елеулі ілгерілеушілікті қамтамасыз етудегі рөлін жоғары бағалаған.
«ENI» компаниясының Бас атқарушы директоры Клаудио Дескальци өзінің жеделхатында Қазақстанның Тәуелсіздік алған сәтінен және оның егемен ел ретінде қалыптасуынан бастап Нұрсұлтан Назарбаев шынайы көшбасшылық пен стратегиялық көрегенділік танытқанын, осы қасиеттер бүкіл әлемнен шетелдік инвестицияларды тартқан қолайлы әрі тұрақты ахуал құруға мүмкіндік бергенін айтқан.
Италияның бұрынғы сыртқы істер министрі, Еуразиялық зерттеулер институтының президенті Франко Фраттини өз хатында Нұрсұлтан Назарбаевқа елдің және тұтас халықаралық қоғамдастықтың игілігі жолындағы қызметінің нәтижелері үшін шынайы құрметін білдірген.
«Дәл Сіздің күш-жігеріңіздің арқасында Орталық Азиядағы және еуразиялық өңірдегі геосаяси үдерістер жалпы алғанда бейбіт әрі табысты өрбіді. Қазақстанның және Сіздің басшылығыңыздың маңызы өңірлік және халықаралық ұйымдар аясында да мойындалды», деп жазады Ф.Фраттини.
Елбасы Нұрсұлтан Назарбаевтың Қазақстанды өркендетудегі айрықша рөлі мен халықаралық аренадағы көрнекті еңбегі ЕҚЫҰ Бас хатшысы Т.Гремингердің, Ресей Федерациясы Федералдық Жиналысының Федерация Кеңесінің төрағасы В.Матвиенконың, Еуропа Қайта құру және даму банкінің президенті С.Чакрабартидің, «Сбербанк» ЖАҚ президенті Г.Грефтің, Татарстанның Тұңғыш Президенті, мемлекеттік кеңесші М.Шаймиевтің, Ингушетия Республикасының басшысы Ю.Евкуровтың, Ресейдің Омбы облысының губернаторы А.Бурковтың, Мемлекетаралық авиация комитетінің төрағасы Т.Анодинаның және Ресейдің ЮНЕСКО істері жөніндегі комиссиясы төрағасының орынбасары А.Дзасоховтың хаттарында да атап айтылған.
Қазақстанның Тұңғыш Президенті – Елбасы өз атына келіп түскен барлық хатпен мұқият танысып шықты және хат авторларына жылы лебіздері мен шынайы тілектері үшін алғыс білдірді.