Үлгі аларлық оңды істер бар

Жұмыс тобы мүшелері Халық­қа қызмет көрсету орта­лы­ғында электронды форматта мемлекеттік қызмет көрсету барысымен танысты. Сондай-ақ жұртшылық өкілдерімен кез­десті. Кездесуден соң Премьер-Министрдің орынбасары Г.Әб­ді­қалықова азаматтарды қабылдады. Одан кейін 14 баланы тәрбиелеп отырған Ольга Кандыбаның отбасында болды. Көп балалы отбасы мемлекетке 7 жер телімін ұсынғаны және «Газель» маркалы автокөлік сыйлағаны үшін алғысын айтты. Сонымен қатар 8 бала­ны тәрбиелеп отырған Индира Отарбаеваның отбасы да «Өкен» ЖШС құрылтайшысына сыйлаған жаңа жеке үйі үшін ризашылығын білдірді.

Жұмыс сапары Өскеменде жалға­сып, ресми топ өкілдері әуелі облыстық мамандан­ды­рыл­ған медициналық орта­лық­та роботтандырылған хирур­гия орталығының жұмысы­мен танысты. Бас дәрігер Юрий Старокожев бір жылда 200-ден астам науқасқа ота жасағандарын айтты. «Роботтандырылған хирургия отаның дәлдігін арттырып, жарақаттың жеңіл әрі операциядан кейінгі ем-домның сапалы болуын қамтамасыз етеді», дейді ол.

Д.Серікбаев атындағы Шығыс Қазақстан мемлекеттік техникалық университетінде облыс активімен кездескен Премьер-Министрдің орынбасары Елбасы тапсырмасымен қабылданған «Әлеуметтік қамқорлық» кешенді бағдарла­масының нәтижесінде өзекті әлеуметтік бастамалар қолға алынғанын атап өтті. 

Басқосуда сөз алған көп ба­ла­лы ана, «NIET.WOMAN» қоғам­дық бірлестігінің жетек­шісі Эльвира Аллахвердиева өңірде көп балалы және аз қамтылған отбасыларды демеу бағытында кешенді жұмыс қолға алынғанына тоқталды. «Кешенді жоспар аясында көп балалы және аз қамтылған от­басы­лардың балалары бала­бақша төлемінен босатылып, оларға мектеп формасы тегін берілмек. Көп балалы аналар және мүгедек бала тәрбиелеп отырған аналарға сұранысқа ие ма­мандықтар бойынша қыс­қа мерзімді курстар ұйымдас­тырылып, жұмыс орындары қарастырылуда», деді ол.

Бүгінде облыста 26 146 көп балалы отбасы тұрса, оның 14 159-ның балалары кәмелетке толмаған. Облыс әкімінің орынбасары Әсем Нүсіпованың айтуынша, кешенді бағдарлама аясында 46 мың адам атаулы әлеу­меттік көмекке қол жеткіз­бек. Мамыр айынан бастап облыстағы көп балалы отбасылар (3 жарым мың) балабақша төлемінен босатылады.

Үкімет басшысының орынбасары шаһардағы көп балалы отбасылардың үйіне барды. Жібек жолы көшесінде тұра­тын Нұрлан Жетпісовтің жұ­байы өмірден ерте озып, бүгін­де бес балаға өзі бас-көз болып отыр. Бірнеше жыл пәтер жал­даған Өскемен тұрғынына «ВК Техногрупп» ЖШС-сі өз­дері салған көпқабатты үйдің бірін­ші қабатынан екі бөлмелі пәтер сыйлады. «Қыздарымның үлкені 10-сыныпта, кенжеміз 1-сыныпқа барады. Бас ауырт­қан баспана мәселесі шешіліп, қуанышқа кенеліп жатырмыз», дейді қайсар әке. Вице-премьер ат басын тіреген екінші отбасы – қала шетіндегі жер үйде 12 бала өсіріп отырған Черкашиндер әулеті. «Родничок» шаруа қо­жа­лығының басшысы А.Митин бұл отбасына көмек қолын созып, құрылыс материалдарын са­тып әперіпті. Алтай ауданын­да тұрған Черкашиндер отбасы Өскеменге былтыр көшіп келген. «Үйіміз таудың етегінде. Әуелде шағын болатын, өз күшімізбен ақырындап кеңейтіп жатырмыз. 0,2 гектар бақшамыз бар. Мамандығым – геолог. Алтайда тұрғанда «Қаз­цинкте» жұмыс істегенмін. Аз­дап ешкі ұстаймыз. Қыздар соны сауып, сүтін сатады. Ұл­дар қорадан шықпайды. Бала­ның көп болғаны қолыңды жұ­мыс­тан босатады. Бұған дейін еш­кім­­ге қол жайған жоқпыз. Өз от­­ба­сыма өзім жауаптымын деп санаймын», деді отаға­­сы. Г.Әб­діқалықова көпке үлгі бо­лар­­л­ық екі отбасына да риза­шы­­лы­­ғын білдіріп, 150 мың теңге­нің қар­жылай сертификатын табыс етті. 

Премьер-Министрдің орынбасары жұмыс сапары аясын­да Еңбек жəне халықты əлеу­мет­тік қорғау министрі Берді­бек С­апар­­баевпен бірге Өске­мен­дегі жұмыспен қамту орталы­ғы­ның қызметімен танысты. Ор­талық қызметкерлері құжат­тар­ды онлайн қабылдау жүйесі 30 сәуірде тоқтатылмаса екен деген тілектерін білдірді. Өйт­кені Өскемендегі 2157 көп балалы от­басының тек 248-іне ғана жаңа форма бойынша АӘК тағайындалыпты. «Қа­жет болса, уақытын созу қажет. Құжат жинауда түрлі кедергілер бар екенін білеміз», деді Г.Әбдіқалықова.

Мүгедектерді әлеуметтік қор­ғау саласындағы үйлестіру кеңес­інің көшпелі отырысы үкі­меттік делегацияның қатысуы­мен Өскеменде өтті. Барлық об­лыс пен Алматы, Нұр-Сұл­тан және Шымкент қалалары әкім­дерінің әлеуметтік салаға жауапты орынбасарлары қатыс­қан бейнережімдегі жиында 2025 жылға дейінгі жаңа Ұлттық жоспардың жобасы талқы­ланды. Үкімет басшы­сының орынбасары елімізде мүм­кіндігі шектеулі азаматтарды қолдау бағытында біршама жұмыс қолға алынғанымен, тү­йіні тарқамаған мәселелер бар екенін, азаматтардың атал­ған санаты қоғамдық көлік­терге мі­ніп-түсуде, түрлі ғимарат­тарға кіруде, жоғары қабат­тар­ға көтерілуде әуре-сарсаңға тү­сіп жүргенін тілге тиек етті. Б.Сапар­баев 2025 жыл­ға дейінгі Ұлттық жоспар 7 бағыттан тұратынын, осы уақытқа дейін азаматтардан 400-ге жуық ұсыныс түскенін, өтініш-тілектер министрліктің ресми интернет сайтында қабыл­данатынын атап өтті.

Отырысты қорытындылаған Г.Әбдіқалықова Ұлттық жоба­ға немқұрайлылық танытпай, жіті назар аударуды, нақты ұсыныс беруді тапсырды. «Осы ретте атап айтқым келетіні, Өскеменде мүмкіндігі шектеулі балаларға арналған «Ақниет» мектеп-интернаты тиімді жұмыс жүргізіп келеді. Міне, осындай білім ордалары елімізде көптеп ашылуы керек», деп түйіндеді Вице-премьер. Отырыстан кейін Үкіметтік делегация мүмкіндігі шектелуі балаларға арналған «Ақниет» мектеп-интернатының жұмысы­мен танысып, балаларға арналып салынып жатқан 200 орындық аурухананың құрылысын көрді. Шығыс Қазақстан облысы