Осыдан екі жыл бұрын Қытайдың «I am a singer» жобасы арқылы теңдессіз талантымен Димаш Құдайберген жаһан назарын жауласа, күні кеше ресейлік «Голос. Дети» байқауы және бір жас дарынның жұлдызын жағып, қазақ атын әлемге мәшһүр етті. Ол – Ержан Максим феномені.
1925 жылы Парижде өткен дүниежүлік этнографиялық көрмеде шыңылтыр үннің шексіз мүмкіндігін көрсетіп, Еуропаның талғампаз тыңдарманын бас игізген Әміре феномені ән салып шыны стақанды шытынатқан Ержан Максим дауысы арқылы төрткүл дүние тыңдарманын тағы бір мәрте дүр сілкінтті.
Он бір жасар оралдық өреннің өнерін жоба басталғалы жіті бақылап, жанкүйер болған тыңдарман қауым байқау соңына дейін тақым қысып, демін ішіне тарта жас таланттың жеңімпаз болу сәтін асыға күткені рас. Өйткені көмбе сызығын бірінші болып кесеріне жерлес жанкүйерлері ғана емес, Алла Пугачева, Игорь Крутой, Валерий Меладзе, Максим Галкин бастаған Ресейдің белгілі музыка мамандары да сенімді болған. Әйтсе де байқау болған соң күткен нәтиженің барлығы бірдей әділетті болып, ақиқатқа айнала бермейтінін «Голос. Дети» жобасы және бір мәрте дәлелдеп берді.
2019 жылдың 26 сәуірінде жарияланған ақтық финал қорытындысы, яғни телефон арқылы жалпыхалықтық дауыс беру нәтижесі көптің наразылығын тудырды. Ресейлік замандасы Микелла Абрамовадан кейінгі 2-орын тұғырынан көрінген Ержанның жеңісі жанкүйерлер мен музыка мамандарының көңілінен шықпады. Әлеуметтік желі арқылы үндеу жолдаған Ресейдің белгілі эстрада әншілері байқаудың әділетті өткеніне көз жеткізу үшін қорытынды нәтижені жоба ұйымдастырушыларынан қайта қарап, тексеруін талап етті. Көптің талабы ескеусіз қалмай, байқау нәтижесі қайта қаралып, дауыс берудегі олқылықтар анықталды. Нәтижесінде, жоба тарихында тұңғыш рет ақтық финал екінші рет өткізілетін болып шешім қабылданды. Сөйтіп 24 мамырда қорытынды гала-концерт қайта ұйымдастырылып, ақтық финалға шыққан барлық өнерпазға бірдей 1 миллион рубль көлеміндегі сыйлық пен арнайы диплом табыс етілді.
Иә, бұл жолы Гран-при болмады. Байқау ақтық финалға шыққан барлық қатысушыны жеңімпаз деп таныды. Сөз соңында жоба ұйымдастырушылары Ержан Максимге қарата мұндай олқылықтың алдағы байқауларда орын алуына жол бермейтіндіктерін айтып, көпшілік қауым алдында уәде берді.
«Бірінші арнаның» бас директоры Константин Эрнстің өзі қазақстандық әншіге: «Ержан, Бірінші арнада ештеңе сатылмайтынын білесің енді» деп айтқанының өзі қазақ өреніне деген ерекше құрмет, талантын бағалағандық болып табылады.
Ал жас әншінің өзі болса: «Менің бұл байқауда бас жүлде алмағаным дұрыс та болған секілді. Егер жеңімпаз болсам, барлығы құттықтап қана қоя салар ма еді. Ал Гран-при емес, 2-орын алуым қоғамда үлкен резонанс тудырып, көптеген музыка маманының, жалпы тыңдармандардың назарын аударды. Жоба қорытындысы қайта қаралды. Дәл мұндай сілкініс болады деп тіпті де ойламаған едім. Бірақ, байқау нәтижесіне, жас өнерпаздардың талантына деген музыка мамандарының жанашырлығы балалар байқауында әділеттіліктің бар екенін көрсетіп берді. Менімен бірге ақтық финалға өткен достарымның бәрін жеңімпаз деп санаймын. Олардың барлығы бірдей мықты, талантты. Мен үшін жеңіс емес, тыңдармандардың менің өнеріме осылай жанкүйер болуынан артық баға жоқ», дейді.
Міне, осылайша қазақтың қара баласының теңдессіз таланты байқау тарихында тұңғыш рет Ресейдегі ең ауқымды да беделді жобаның нәтижесін өзгертіп, өнер әлемінде шын мәнінде сілкініс тудыра алды. Ал бұл – сөзсіз бас жүлдеге бергісіз жеңіс!