Ел өміріндегі тағы да бір тарихи сәттің куәсі болдық. Қасым-Жомарт Тоқаевтың ұлықтау рәсімінде алға тартқан негізгі мәселелерінің ішінде азаматтардың құқығын алдыңғы орынға қою, халықтың әл-ауқатын жақсарту, қоғам дамуын тұрақты ету жайы көңілімізге қонды. Бұл мәселені жүйелі түрде реттеу үшін қоғам мен билік арасындағы диалогты жолға қою маңызды.
Президент алға тартқандай, әуелі қоғамға сенім мен келісім керек. Сенім мен келісімді қамтамасыз етудің арғы жағында саяси диалог құрып, бүкіл қоғамның, азаматтардың заңды құқықтарын біріктіретін, топтастыратын сол арқылы барша ұйымдармен, мейлі ол тіркелсін, тіркелмесін, есептесіп санасу қажеттігі тұр. Сол топтармен үлкен мәмілеге келіп, Қазақстанда жаңа заманға, жаңа дәуірге қатысты саяси бәсекелестік пен белсенділіктің ойын шарттарын өзгертуге тың серпін беріп, саяси заңнамаға қатысты, бүкіл қажетті деген саяси заңдарды қарап шығу қажет сияқты. Яғни, қоғамдық келісім, қоғам ішіндегі өзара сенім деген мәселелерді реттеу үшін бізге жаңа сипаттағы саяси алаң, жаңа сипаттағы саяси ойыншылар қажет.
Саяси партиялар, қоғамдық ұйымдар, сайлау туралы заңдарды қайта қарап, оларды әлемдік, еуропалық стандарттарға жақындату маңызды. Әлеммен бірге дөңгелеу үшін осы басым бағыттарды басты назарда ұстаған абзал. Сол арқылы саяси белсенділікті жаңа биікке көтере аламыз.
Айдос САРЫМ,
саясаттанушы