Nur Otan партиясының бастамасымен құрылған Демократиялық күштердің «Қазақстан-2050» Жалпыұлттық коалициясы – елдегі ең үлкен диалог алаңдарының бірі. Ол 5 саяси партияның және 24 ірі қоғамдық бірлестіктің басын біріктіріп, 6,5 млн қазақстандықтың мүддесін қорғайды.
Келелі кеңесте Nur Otan партиясы Төрағасының бірінші орынбасары Мәулен Әшімбаев қазіргі таңда Қазақстан дамудың жаңа дәуіріне қадам басқанын айтты. Ол сайлауда қазақстандықтардың басым бөлігі өз дауыстарын Қасым-Жомарт Тоқаевқа беріп, Елбасымыздың стратегиялық саясатының сабақтастығы мен еліміздің тұрақты дамуын таңдағанын, соның нәтижесінде Қазақстанда жоғары биліктің ауысуы еліміздің барлық заңына сәйкес жүргізілгенін атап өтті. Осылай дей келе Мемлекет басшысы ұлықтау рәсімінде атап көрсеткен билік пен қоғамның алдында тұрған ең негізгі мақсаттарға тоқталды.
– Қазақстан Президенті Қасым-Жомарт Тоқаев билік пен азаматтық қоғам арасындағы диалогты әрі қарай дамыту керектігіне ерекше назар аударды. Оның бір дәлелі – Мемлекет басшысының Жарлығымен құрылған Ұлттық қоғамдық сенім кеңесі. Бұл – Қазақстанда азаматтық қоғамды дамыту жолында жасалған нақты қадам. Мемлекет басшысы атап өткендей, біртұтас ұлт болып қалу – біздің басты бағдарымыз. Сондықтан жұдырықтай жұмылып, қоғамның барлық өкілдерін, соның ішінде жастарды да диалогқа шақырып, бірігіп әрекет етсек қана көздеген мақсаттарымызға қол жеткіземіз. Ұлттық қоғамдық сенім кеңесі азаматтық қоғамның дамуына тың серпін беріп қана қоймай, жаңғыру мен реформалардың өзегіне де айналады деп қабылдаймыз. Миллиондаған қазақстандықтың пікірі мен көзқарасын білдіретін Демократиялық күштердің Жалпыұлттық коалициясы осындай маңызды кезеңде Елбасы саясатының сабақтастығын қамтамасыз етіп, Президентіміздің елдің алдына қойып отырған мақсаттарға қол жеткізуіне өзінің сүбелі үлесін қосуы үшін жұмыс істейді, – деді Мәулен Әшімбаев.
Отырысқа елдегі жетекші партиялардың басшылары, Парламент депутаттары, Қазақстан халқы Ассамблеясының, кәсіби және қоғамдық бірлестіктердің өкілдері қатысты. Жиын барысында коалиция мүшесі, «Ақ жол» демократиялық партиясының төрағасы Азат Перуашев сөз алып, тәуелсіздіктің, тұрақтылықтың қадірін біліп, тыныштық пен бейбіт өмірді сақтауымыз керектігін, ол үшін қоғамдағы өзекті мәселелерді заң шеңберінде шешу маңызды екенін жеткізді.
Бұдан кейін «Бірлік» партиясының төрағасы Серік Сұлтанғали Тұңғыш Президент өңірлердің әкімдеріне халықтың әл-ауқатын көтеру үшін барлық мүмкіндікті жасағанын атап көрсетті. Тек әкімдердің сол үдеден шыға білуі керек-ті. Яғни, әкімдердің салғырт жұмысының соңы осындай дауға ұласты деген пікірде.
Ал «Ауыл» партиясы төрағасының бірінші орынбасары Толымбек Ғабділәшімов жиналған қауымның назарына агроөнеркәсіп кешенін дамытуға барынша көңіл бөлу, сол арқылы халықтың тұрмысын түзеу туралы ұсыныс білдірді. Сондай-ақ сайлауалды науқан барысында ауылдарды гүлдендіру кеңінен насихатталғанын атап өтті. Оның бұл ойын Мәулен Әшімбаев та құптап, халықтың 42 пайызы ауылдарда тұратынын, сондықтан бұл салаға басымдық берілетінін қоса айтты.
Сонымен қатар бұл отырыста «Жаңару» сыбайлас жемқорлыққа қарсы жалпыұлттық қозғалысы» РҚБ президенті Оралбай Әбдікәрімов, Қазақстан Республикасы Кәсіподақтар федерациясының төрағасы Бақытжан Әбдірайым, «Атамекен» ұлттық кәсіпкерлер палатасының басқарма төрағасы Абылай Мырзахметов және «Қазақстан тұтынушыларының ұлттық лигасы» РҚБ төрайымы Светлана Романовская сөз сөйлеп, Ұлттық қоғамдық сенім кеңесінің жұмысын жандандыру үшін жан-жақты пікірлерін ортаға салды.
Іс-шара соңында барша қазақстандықтарды ынтымаққа, бірлікке, қазақстандық даму жолының басты құндылықтары – қоғамдық келісім мен саяси тұрақтылықты, этносаралық және конфессияаралық бейбітшілік пен төзімділікті сақтауға, сондай-ақ барлық қоғамдық-саяси күштерді сайлаудан кейінгі кезеңде еліміздің стратегиялық мақсаттары жолында бірігуге, Қазақстан Президентінің ел дамуының өзекті мәселелеріне қатысты билік пен азаматтық қоғам арасында тұрақты және конструктивті диалог құру бастамасын қолдауға шақырған Үндеу қабылданды.