ТМД Парламентаралық ассамблеясы отырысы

Отырыс кезінде Достастық елдері Пар­ламенттерінің депутаттары сайлау үдерісін халықаралық байқау институтының демократия мен сайлау мәдениетін дамытудағы рөлін талқылады. Бұл ретте Сенат төрағасы өңірдегі елдер ынтымақтастығының маңызды бағыттарының бірі сайлау мен референдумдарды өткізуге мониторинг жүргізу болып қала беретінін атап өтті.

«Қазақстан Президенті Қасым-Жомарт Тоқаев қазан айында Мәскеуде өткен ТМД мемлекеттері басшыларының саммитінде біздің елдеріміз үшін Достастықтың әлеуе­тін одан әрі нығайту мен оның беделді халық­аралық ұйым ретіндегі рөлін арттыру сөзсіз басымдық екенін атап өтті», деді М.Әшімбаев.

Сондай-ақ палата спикері халықаралық байқау институты Достастық кеңістігіндегі сайлау үдерістерінің маңызды және ажырамас бөлігіне айналып, олардың ашықтығын арттыруға ықпал еткенін алға тартты.

«Халықаралық байқау дегеніміз – сайлау рәсімдерінің сақталуын тексеру ғана емес, сонымен қатар заңның үстемдігін және мемлекет пен қоғам арасындағы диалогті қолдаудың маңызды тетігі. Бұл тәсіл сайлау үдерістерінің халықаралық стандарттарға сәйкестігін қамтамасыз етуге әрі оларға деген сенімді нығайтуға мүмкіндік береді. Байқау үдерісі егемендік пен мемлекеттілікті құрметтеу қағидаттарына негізделетінін атап өткен жөн. Бұл ретте халықаралық байқау миссияларының қызметі объективті және ашық сипатта болады», деді Сенат спикері.

Сонымен қатар М.Әшімбаев парламенттік диалогтің мемлекетаралық ынтымақтас­тық­ты нығайтудағы маңызы туралы айтып, Мем­лекет басшысы Қасым-Жомарт Тоқаевтың бас­тамасымен іске асырылып жатқан Қазақстанның қоғамдық-саяси өміріндегі рефор­маларға тоқталды.

«Қасым-Жомарт Тоқаев атап өткендей, демократия дегеніміз – нәтиже емес, өз елінің тағдырына бейжай қарамайтын азаматтар­дың тұрақты қатысуын талап ететін үдеріс. Біз Қазақстандағы билік институттарының сайлан­балылығын кеңейтіп жатырмыз. Ауыл­дық елді мекендердің әкімдерін сайлау­ды қалып­тастырдық. Енді аудан әкімдерін сайлау­ды қолға алдық», деді М.Әшімбаев.

Бұған қоса Сенат спикері Мемлекет басшысының бастамасымен жүргізіліп жатқан реформалар аясында қазіргі таңда елімізде аса маңызды мәселелер референдумға шығарылатынын айтты.

«Қазақстанда өткізілген АЭС салу мәселесі жөніндегі республикалық референдум бар­лық маңызды шешімді ел азаматтарының пі­кірін ескере отырып қабылдауға үндейтін «Халық үніне құлақ асатын мемлекет» саясаты­ның жарқын көрінісіне айналды. Алғаш рет референдумға экономикалық сипаттағы мәселе шығарылды. Дауыс беру үдерісіне 40 мыңнан аса ұлттық және 30 елден келген 170 халықаралық байқаушы мониторинг жүргізді. Байқау қорытындысында ТМД миссиясы референдумның ел заңнамасына және халықаралық стандарттарға сәйкес еркін әрі ашық өткізілгенін жеткізді. Біз ТМД байқаушылар миссиясына осындай объективті және сындарлы бағалау үшін ризашылығымызды білдіреміз», деді М.Әшімбаев.

Сенат спикері бірлескен жұмыстың алдағы кезеңдегі басым бағыттарын белгілеп, 2025 жылы ТМД-ға төрағалық ететін Тәжікстан Республикасын құттықтады.

Отырыс барысында қатысушылар ТМД Парламентаралық ассамблеясының аграрлық саясат, табиғи ресурстар және экология жөніндегі тұрақты комиссиясының төрағасы лауазымына Қазақстан Парламенті Сенатының депутаты Ольга Булавкинаның кандидатурасын бекітті. Ал сенатор Геннадий Шиповскихті ТМД Жастар Парламентаралық ассамблеясының үйлестірушісі етіп тағайындау туралы шешім қабылдады.

Палата төрағасы ТМД ПАА алаңында парламенттік делегациялардың басшыларымен бірқатар екіжақты кездесулер де өткізді.

Беларусь Республикасы Ұлттық Жиналысы кеңесінің төрағасы Наталья Кочановамен кездесуде М.Әшімбаев көпжақты алаңдар аясындағы өзара іс-қимыл, сондай-ақ сауда-экономикалық және мәдени-гуманитарлық байланыстарды нығайту жөніндегі ауқымды мәселелерді талқылады.

Сенат спикері Тәжікстан Республикасының Маджлиси Оли Маджлиси милли төрағасы Рустами Эмомалимен кездесу барысында Парламент депутаттарының өңірдің экономикалық дамуы жолындағы бірлескен күш-жігері жөнінде пікір алмасты. Мәулен Әшімбаев тәжік парламентшілерін «Орталық Азияның орнықты дамуы: Парламенттер мен жергілікті өкілді органдардың рөлі» тақыры­бына арналған парламенттік комиссияның кеңейтілген отырысына қатысуға шақырды. Аталған іс-шараны биылғы желтоқсан айында Астанада өткізу жоспарланып отыр.

Мәулен Әшімбаев Өзбекстан Респуб­ликасы Олий Мәжілісі Сенатының төрағасы Танзила Нарбаевамен кездесуде әріптесін 27 қазанда аталған елде демократия мен мемлекеттің саяси жүйесін дамытудың жаңа кезеңін белгілеп берген сайлаудың сәтті өтуімен құттықтады.

Ресей Федерациясы Федералдық Жиналы­сы Федерация Кеңесінің төрағасы Валенти­на Матвиенкомен сұхбат барысында Мәу­лен Әшімбаев парламенттік диалогтің мем­лекетаралық ынтымақтастық және өзек­ті мәсе­лелерге қатысты сындарлы шешім­дер қабыл­дау кезіндегі маңызды рөліне назар аудар­ды. Сонымен қатар ол Қазақстан Пар­ламентінің Сенаты мен Ресейдің Федерация Кеңесі арасындағы Ынты­мақтастық жөніндегі комис­­сия қыз­метінің нәтижелеріне және алдағы уақытта Парламентаралық ынтымақтастықты дамыту­дың 2025–2027 жылдарға арналған жол картасына қол қоюдың маңызына тоқталды.