Бұл туралы Сыбайлас жемқорлыққа қарсы іс-қимыл агенттігінде өткен баспасөз мәслихатында хабарланды. Агенттік өкілдерінің айтуларына қарағанда, жергілікті жерлерде үздіксіз бақылау және делдалдармен күрес жүйелі болғанымен, адами факторларды түбегейлі жою мүмкін болмай отыр.
– Біздер теміржол вокзалдары мен пойыздарда қоғам өкілдерін қатыстыра отырып, рейдтік шараларды үздіксіз жүргізіп келеміз. Мәселен, 2018 жылдың қыркүйек айынан бері барлық бағыттар бойынша 360 рет жолға шығып, пойыздарда билетсіз жүрудің 362 және 35 рәсімделмеген жүк пен багаж тасу дерегін анықтадық. Өкінішке қарай уәкілетті органдар мен ұлттық тасымалдаушы тарапынан бақылаудың аздығынан адам факторына байланысты заң бұзушылық деректері көп, – дейді «Адал жол» жобалық кеңсесінің жетекшісі Исламбек Майшекин.Сондықтан мүдделі тараптар бұл олқылықты жолаушылар тасымалы саласын автоматтандыру және цифрландыру арқылы жоюға ниетті.
Осыған байланысты ақпараттық жүйені енгізуші «Инстант Пэйментс» ЖШС өкілі жаңа бағдарлама «Орын аула» механизмін бұғаттауымен ерекшеленетінін айтты. Бұл тетікті қазіргі уақытта кассирлер қайтарылған билетті өзге тұлғаның атына қымбат бағасына рәсімдеп беруде кеңінен пайдаланып жүр.
Енді әрбір жолаушының біреудің қайта тапсырған билетін сатып алуға тең құқығы қамтамасыз етіледі. Жетілдірілген жүйеде «Орын аула» механизміне жол берілмейді. Аталған жүйе қысқа уақыт ішінде бес билеттен артық сатып алуға автоматты түрде шектеу қояды.
Баспасөз мәслихаты барысында белгілі болғандай, Сыбайлас жемқорлыққа қарсы іс-қимыл агенттігі бюджет қаражатының жұмсалуына байланысты да бірқатар заң бұзушылықтарды әшкерелеген. Бұл бағыттағы қылмыстар мемлекеттік қызметшілермен ғана емес, сондай-ақ мемлекеттік көмекті және мақсатты әлеуметтік көмек алуға құқығы жоқ азаматтарға да қатысты болып отыр.
Мысалы, Павлодар қаласының №2 соты Еңбек, әлеуметтік қорғау және көші-қон комитетінің Павлодар облысы бойынша аумақтық департаментінің бөлім басшысына, «Азаматтарға арналған үкімет» Мемлекеттік корпорациясы директорының орынбасарына және осы мекеменің бөлім басшысына облыстың азаматтарынан 300 мың теңгеден бастап 1 млн 200 мың теңге аралығында сыйақылар алып, осы сыйақыға оларға заңсыз зейнетақылар аударып, бюджеттің 107 млн теңге қаражатын ысырап еткендері үшін әртүрлі мерзімдерге соттады.
Сондай-ақ қылмыстық жауапкершілікке заңсыз зейнетақы алған 49 азамат және олардың 13 көмекшісі тартылған. Заңсыз зейнетақы алған 35 адам мемлекетке келтірілген залалдың 73,6 млн теңгесін бюджетке қайтаруына байланысты оларға қатысты қылмыстық қудалау ақтамайтын негізбен қысқартылды.
Ал Жезқазған қаласының соты Облыстық әлеуметтік қорғау және көші-қон аумақтық департаментінің «№3 Медициналық-әлеуметтік сараптама» бөлімі басшысына азаматтарға II немесе III топтағы мүгедек деген анықтамасын беру және оларды кедергісіз медициналық куәландырудан өтулері үшін жүйелі түрде пара алғандары үшін 20 млн теңге көлемінде айыппұл салды.