Ал құзырлы орындар болса оларға бизнес әліппесін үйрету, қаржылық қолдау көрсету бойынша кеңес-көмек көрсетіп келеді. Осы бағытта жуырда Азия даму банкінің қолдауымен «Атамекен» ҰКП «Ауылдық жерлерде әйелдер кәсіпкерлігін дамыту» атты тегін шеберлік сабағын – Ақтауда ауылдың кәсіпкер әйелдеріне арналған семинар өткізді. Әйелдер кәсіпкерлігін қолдау, сондай-ақ ауыл әйелдерінің әлеуметтік-экономикалық әлеуетін дамыту бағытындағы семинарға облыстың барлық ауданынан 60-тан астам әйел кәсіпкер қатысты. Олардың қатарында шаруа қожалықтарының, өндірістік кәсіпорындардың басшылары мен жеке кәсіпкерлер бар.
– Екі күндік оқытуда бизнес-тренер тәжірибелік тапсырмалар мен кейстер арқылы әйелдерді кәсіпкерлік негіздеріне, бухгалтерлік және басқару есебіне үйретіп, салық пен инвестиция тарту сұрақтарына жауап берді. Сонымен бірге тыңдаушылар жеке брендті дамытудың маңыздылығын, пиар жұмысын үйлестіру мен интернет-маркетинг негіздері туралы толық үйреніп, білді, дейді «Атамекен» ҰКП басқарушы директоры, әлеуметтік бастамалар департаментінің директоры Салтанат Әбдікәрімова.
Оқыту аясында қатысушыларға Қазақстанда бизнесті жүргізудегі қаржылай және қаржылай емес қолдау туралы Кәсіпкерлер палатасының мамандары таныстырды. Ал кәсіпкерлікті қолдау бағдарламалары жөнінде «Даму» кәсіпкерлікті дамыту қоры» АҚ өңірлік филиалының қызметкерлері кеңінен тоқталды.
Сонымен бірге екінші деңгейлі банктер мен шағын несиелік ұйымдардың өкілдері нәзік жанды іскерлерге шағын және орта бизнес субъектілерінің жобаларын қаржыландыру бағдарламалары мен оларға қатысу шарттарын түсіндірді.
Қатысушылар өз кезегінде семинардың кәсіби біліктіліктерін көтеру үшін қажетті шара екенін, сондай-ақ ауылдық жерлерде жаппай кәсіпкерлікті дамыту идеясын танымал етудің маңыздылығын атап өтті.
– 3 млн теңге несие алып, мал шаруашылығын жақында бастадым. Ұлттық өнімдерді, шұбатты сатылымға шығаратын ойым бар. Маңғыстау ауданынан 12 кәсіпкер келіп отырмыз. Семинарға келгеніме өте қуаныштымын. Бизнес құру, оны дамыту, қаражатты дұрыс жұмсау, банкротқа ұшырамау әдістерін үйретті, – деген ойымен бөлісті кәсіпкер Сәуле Бусаханова.
Әйел кәсіпкерлердің қатысуымен өңірде құрылыс, дәрігерлік қызмет көрсету, демалыс аймақтары, өзге де ірі салалармен бірге үй тұрмысына, азық-түлікке, сондай-ақ ұлттық үлгідегі бұйымдарға қатысты кәсіпкерлік дамиды деп күтілуде.
Маңғыстау облысы