Ұлы Абай мен Қарқаралы – егіз ұғым. Қарқаралы қаласында Абай тоқтаған үй бар. Қарқаралының татар көпесі Халиолла Бекметов салған бұл көктөбел ағаш үй ұлы ойшылдың ұлағатты өмірінен сыр шерткен тарихи жәдігер ретінде бүгінде көпшіліктің тәу етер киелі орнына айналған. Бұл үйдің Абай ұлағатын пір тұтқан ұрпақтарға шын мәнінде қасиетті орын екендігін көктөбел үйдің маңдайшасына жазылған: «Бұл үйде 1850 жылы ұлы ақын-ағартушы Абай Құнанбаев болған» деген айшықты жазулар паш етіп тұр. Қазір бұл ғимаратта аудандық мәдениет бөлімінің кеңсесі орналасқан.
Жақында осы Абай бабамыз тоқтаған үйдің алдында Қарқаралы тауларының табиғи тасына қашалып салынған Абай бейнесі бой көтерді. Тастың биіктігі 350 сантиметрден асады. Сурет авторлары: Қарқаралы ауданының мемлекеттік архивінің басшысы Манарбек Кәрім мен оның баласы – Қарқаралы қаласы, А.Жәутіков атындағы қазақ орта мектебінің 11 сынып оқушысы Ерасыл Кәрім. Халық арасынан шыққан қарапайым шеберлер ұлы ойшылдың бейнесін ерекше ыждағаттылықпен дәл өрнектеген.
Аталған тас ескерткішті аудан, қала жұртшылығымен қатар, Абай атамыздың Семейден арнайы келген туыстары да тамашалады. Тас ескерткіш қазірдің өзінде қала қонақтары арнайы барып суретке түсетін, ұлы ақынның рухына тәу ететін рухани орынға айналды.
Суретте: табиғи тасқа қашалған Абай бейнесі және авторлар.