Ертең, яғни 3 қазанда Қазақстандағы барлық мектепте «Эко-сағат» кең көлемді акциясы басталады. Бұл туралы еліміздің Экология, геология және табиғи ресурстар министрі Мағзұм Мырзағалиев хабарлады.
«Достар, осы бейсенбіде еліміздің барлық мектептерінде «Эко-сағат» атты факультатив оқытыла бастайтынын қуана хабарламақпын. Бұл күн кездейсоқ таңдалған жоқ. 3 қазанда Дүниежүзілік мекендеу орнын қорғау күні аталып өтеді», деп жазды министр Twitter-дегі өз парақшасында. Министрдің дерегі бойынша, акцияға Үкімет мүшелері, өңір әкімдері қатысады. Министрлер мен әкімдер республика мектептерінде сабақ өткізіп, содан кейін оқушыларға ағаш отырғызуға көмектеседі.
«Біз бұл күні Қазақстанда 200 мыңнан аса ағаш отырғызылады деп үміттенеміз. Қазақстанда «эко-сағат» өткізу дәстүрге айналып, халықты экологиялық тұрғыда тәрбиелеуге едәуір үлес қосады деген ойдамын», деді Экология министрлігінің басшысы.
Жоспар бойынша, акцияға Қазақстандағы 6 мың мектеп пен 2 млн оқушы қатысады. Ал 12 қазанда еліміздің барлық тұрғындары аталған акцияны жалғастырмақ.