Батыс Қазақстан облыстық Полиция департаментінің бастығы Махсудхан Әбләзімов Ақсай қаласында халық алдында есеп берді.
Батыс Қазақстан облысы Полиция департаментінің бастығы, полиция генерал-майоры Махсудхан Әбіләзімов қызметтік іссапармен Бөрлі ауданының орталығы Ақсай қаласында болып, аудандық полиция бөлімінің жай-күйімен танысты. Генералдың мәлімдеуінше, жақында аудандық полиция бөлімінде қала көшелеріндегі бейнебақылау камераларын қадағалауға арналған жедел-басқару орталығы ашылмақ. Бөлімде түрлі сауалдарымен келген азаматтарды қабылдаған генерал Қарашығанақ кен орнындағы қауіпсіздік мәселесін де тексерді.
Ақсай қалалық Мәдениет үйінде өткен есептік кездесуде генерал-майор облыстағы ішкі істер органдарының биылғы 8 айда атқарған жұмысы туралы баяндады.
Департамент бастығының айтуынша, өңірде 8 ай ішінде жалпы тіркелген қылмыс саны 11,2%-ға, ал қылмыстың деңгейі 10 мың тұрғынға шаққанда 146-ға дейін немесе 20 позицияға азайған. Сонымен қатар орташа ауырлықтағы қылмыс саны да 20,9% -ға кеміген екен.
– Біздің департамент республика көлемінде ауыр және аса ауыр қылмыстарды ашу көрсеткіші бойынша 2-орында, ал ауырлығы онша емес қылмыс түрінің ашылу көрсеткіші бойынша 1-орында тұр. Бұл жетістікке облыс әкімдігінің және депутаттар корпусының белсенді әрі жан-жақты қолдау көрсетуі арқасында қол жеткіздік. Ішкі істер органдарының материалдық-техникалық базасы жақсартылып, заманауи байланыс құралдары, бірқатар инновациялық бағдарламалар сатып алынды, қолданысқа енгізілді. Облыстағы криминогендік ахуалды сауықтыру бойынша полиция бар күшін салып, өз міндетін одан әрі жалғастыратын болады, – деді полиция генерал-майоры.
Есеп беру барысында департамент басшысы облыстағы түрлі қылмыстар, ұрлық, қарақшылық шабуыл, адам зорлау фактісі, кісі өлтіру, жол-көлік оқиғалары, алаяқтық, есірткіге тәуелділік фактілері бойынша жеке-жеке тоқталып өтті.
Жиын соңында қала тұрғындары және бірқатар пәтер иелері кооперативінің басшылары қаладағы бұзақылық қылмыстар, жолдағы қауіпсіздік мәселелері бойынша сұрақтар қойды.
Департамент басшысы қоғамдық тәртіп пен қауіпсіздікті қамтамасыз ету, Қазақстан Республикасы азаматтарының өмірі мен денсаулығын қорғау ісінде ішкі істер органдарына қолдау көрсеткені үшін Бөрлі ауданына қарасты бірқатар ауыл әкімдеріне, «Қарашығанақ Петролеум оперейтинг Б.В.», «Азия Групп Секьюрити» компанияларының қызметкерлеріне алғыс хат табыс етті.
Батыс Қазақстан облысы