Қаржы қызметін тұтынатындарды қорғайтын платформа: Алматыда АХҚО қаржы форумы өтті

Бүгінде 26 елдің 250-ден астам компаниясы АХҚО қыз­метін пайдаланады. Қ.Келім­бетов олардың арасында әр­түрлі ірі компаниялар, әлемдік ком­мерциялық банктер бар екенін айтты. Орталық 10 жыл ішінде компаниялар санын мыңға жеткізуді  жоспарлап отыр. Қ.Келімбетовтің айтуын­ша, Қазақстан  инвестиция­лар­ды өте жақсы қабылдады, дегенмен келесі деңгейге көте­ріліп, екі есе тартымды болу үшін көп жұмыс істеу керек.

«Халықаралық қаржы орта­лығы аясында, инвесторлар талабына жауап беретін плат­форманың бірнеше деңгейі бар. Біріншіден, бұл құқықтық алаң. ТМД елдері арасында біз­ жеке құқық қағидаттары мен нор­маларына негізделген жеке коммерциялық, келісім­шарттық заңды қолданатын жал­ғыз елміз. Екінші бағыт – рет­тегіш. Біз өзіміздің реттеуі­шімізді құрдық. Бұл қаржы инс­титуттарын тіркеуге және қар­жылық лицензия беруге мүм­кіндік береді. Құқықтық ортадан кейін біз ұсынатын өте ма­ңызды деңгей – қаржылық плат­форма. Сіздер америкалық ком­паниямен бірлескен жа­ңа биржаның құрылғанын білесіздер. Біз әлемдегі екінші биржамыз, өз технологиямызды бел­сенді түрде таратудамыз. Бұл маңызды қадам болды. Өйт­кені, капитал нарығын қайта бастау үшін орталыққа банктік несиелендіру ғана емес, капитал нарығында қар­жы­­лан­дырудың жаңа құралы да қажет», деді Қ.Келім­бетов. Соны­мен қатар ол түрлі инвес­тициялық қорлар­ға лицензия берілетіндігін атап өтті. Жуыр­да қазақстандық же­ке ин­­вес­тициялар қоры құ­рыл­­ды. Бүгінгі таңда жарғылық ка­пи­­талда 70 миллиард теңге бар.

«Біз платформамыздың бір­неше деңгейін біріктіргіміз келеді. Қаржылық, заңдық, технологиялық бөлім бізге алға жылжуға мүмкіндік береді», деді АХҚО басқарушысы.

Б.Сағынтаев өзінің құт­тық­тау сөзінде Алматыда Қазақ­станның салық төлейтін ірі компанияларының үштен бірі, 30-дан астам трансұлттық ком­­па­ния, банктердің бас кеңсе­лерінің 86%-ы, біріккен кәсіп­орындар мен ірі халық­ара­лық ұйымдардың 43%-ы ор­на­лас­қанын атап өтті. Алматы – 36 миллиард доллар экономика­сы бар Орталық Азияның ең дамыған мегаполисі.

«Біз алдымызға жаһандық қала болу, өмір сүру сапасы әрі эко­номикалық мүмкіндіктері жағынан үздік 100 мегаполис қатарына ену сынды ұзақ мер­зімді міндет қойып отырмыз. Алматы халқының саны қала маңындағы тұрғындарды қоса есептегенде қазірдің өзін­де үш миллионға жақындап қалды, ал 2030 жылға қарай бес мил­лион­ға жетуі мүмкін», деді Б.Сағынтаев.

Әкім шет аймақтарды қала стандарттарына сай дамыту жөніндегі «Жаңа Алматы» үш жылдық жоспарын жүзеге асы­ру үшін 800 млрд теңгеге жуық бюджет қаржысы мен жеке инвестиция қажет еке­нін, сол арқылы шаһардағы бас­тамалардың орындалуын және алматылықтардың тұр­мыс жағдайын жасқартуды қамтамасыз ететін салық түсі­мін арттыруға болатынын айтты.

Алматы әкімдігі «Ас­тана» ХҚО-да тіркелген инвес­ти­циялық қормен ынты­мақ­­та­стықты қалыптастыруды жос­парлауда. Б.Сағынтаев Үкі­метпен бірге бизнес жүр­гізуде әкімшілік кедергілерді азайту, тіркеу ресімдерін жеңіл­дету үшін шаралар пакетінің қолға алынғанын атап өтті.

«Алматының Индустрия­лық аймағында мемлекеттік бюджет есебінен бірегей инфра­құрылым қалыптасты, сонымен қатар «Инновациялық технологиялар паркі» АЭА-да салық тө­леу және басқалары бойынша жеңілдіктер қарастырылған», деді қала әкімі.

Айта кетерлігі, мегаполис­те бизнесті қолдаудың бір­қа­тар консалтингтік және қар­жылық шаралары жүзеге асуда. Мыса­лы, Qoldaý кәсіпкерлікті қолд­ау орталығы бизнеске бір­ тере­зе қағидасы бойынша­ мем­лекеттік қызметтер мен тегін кон­­сал­тингтік қызметтер көр­сетеді. «Almaty Finance» ком­паниясы мен «Almaty» микро­қаржы ұйымы шағын және орта бизнесті қолдау үшін 2%-дан 7%-ға дейін жеңіл­детілген несие береді.

«Жалпы біз келер жылдан бастап шағын және орта биз­несті қаржылық қолдау көле­мін үш есе ұлғайтуды жос­­парлаудамыз. Биыл бұл көр­­сеткіш 11,5 миллиард тең­геге, келер жылы 30 млрд тең­­­геге жетуге тиіс. Одан әрі ше­­­шім қабылдау үшін сарапта­ма базасына сүйене отырып, оның ішінде әкімдіктің ситуа­циялық орталығы мен Big Data негізінде қолдау шараларына түзету енгізетін боламыз», деп атап өтті мегаполис басшысы.

Б.Сағынтаев әлеуетті инвесторлар үшін тауарларды өңдеу және қайта өңдеу, көлік-логистика қызметі, туризм салаларының перспективалы бағыттар екенін жеткізді. Осы өміршең салаларда жаңа өнді­ріс ашуға зор ықпал ететін креа­­тивті экономикаға ерекше на­зар аударған жөн.

Қазақстандық қаржы фору­мы – тұтынушылар құ­қын қорғау, АХҚО-ның бизнес­ті дамытуға беретін мүмкін­діктерін талқылайтын алаң. Форумның мақсаты – АХҚО-да жүргізілетін инвестиция тартудың негіздері және бизнес жүргізудің шарттары тура­лы хабардар ету, сонымен қа­тар қаржы қызметін тұтыну­шы­ларды қорғау.

Алқалы жиында АХҚО сарапшылары спикер ретінде қар­жы қызметін, қаржы технологиясын, «жасыл» облига­ция мен ислам облигациясын шығаруды реттеу, бағалы қағаздар нарығын инвестиция­лау, сонымен қатар үздіксіз кәсіби даму туралы жан-жақты мағлұмат берді. Бұл форум  спи­керлердің әдеттегі монологы форматында емес, залдағы қатысушылармен арадағы қызу пікір­талас сипатында болды. Барлық қатысушыларға мәсе­лені шешу жолдары туралы тәжірибе, ақпарат және жаңа деректермен алмасу мүмкіндігі берілді.

АЛМАТЫ