Алматының аймақтағы рөлі күшейеді

Орталық жұмысы шамамен бір жылдан кейін басталуға тиіс. Бұл Кавказ, Орталық Азия және Моңғолия аймағында тоғыз мүше мемлекетке әлеуетті дамыту бо­йынша қызмет көрсетеді. Сон­дай-ақ фискалдық саясат, орта­лық банк операциялары, қар­жы секторын қадағалау және мак­ро­экономикалық статистика қам­тылады деп күтілуде.

«Орналасатын жерді таңдау барысында көптеген салаларды, соның ішінде қаржылық қол­дау­ды, рейстердің тоғысу мүмкінд­ігі мен кең әкімшілік және ло­гис­тикалық бағыттарды қамти­тын мәселелер мен ұсыныс­тарды на­зар­ға алдық. Біз Грузия, Қазақ­стан және Өзбекстан биліктеріне ор­талық ашуға ұсыныс жасағаны үшін алғыс айтамыз», деді К.Грассо.

RTAK Халықаралық валюта қорының қызметін аймақта жоспарлау, үйлестіру және іске асырумен айналысады. Ол ХВҚ-ның басқа да орталықтарының тәжірибесіне сүйенеді.

Жуырда Ұлттық банк төрағасы Ерболат Досаев жұмыс сапарымен Вашингтонға барып, ХВҚ-ның жаңа басқарушы директоры Кристалина Георгиевамен кез­дескен болатын. Кездесуде Алматыда жаңа аймақтық тех­ни­калық көмек орталығын ашу туралы келісімдерді іске асы­­ру­дың тетіктері және маман­­дар­мен қамтамасыз ету мәсе­лесі тал­қы­ланды. Алдын ала қол жет­кен келі­сім­дер бойынша Алматы­дағы орта­лықта қазақстандық мамандар да штаттық жүйеде жұмыс істейді.

Экономист Олжас Төлеуов RTAK-тың ашылуы Ұлттық банк үшін ғана емес, мемлекеттің эко­номикалық және қаржылық саясаты үшін де жағымды жаңалық екенін айтады. Себебі Ұлттық банк пен Үкіметтің экономикалық блогы монетарлы және фискальды саясат бойынша халықаралық сараптаманың көмегіне жүгінуге мүмкіндік алады.

«Бұл елімізде инвестиция­лық ахуалды жақсартатын қосым­ша фактор болады. Сондай-ақ Алматы­­ның бизнес орталық ретін­дегі аймақтағы рөлін күшейтеді» деді О.Төлеуов.

Өзбекстан Президенті Шавкат Мирзиёевтің жүргізген реформалары мен барынша ашық болуға ұмтылуына қарап бірқатар сарапшылар жаңадан ашылатын немесе бұрыннан бар халықаралық қауымдастықтардың өкілдіктері, халық­аралық институттар мен ком­паниялар көш басын Өзбек­станға қарап түзейді деген пікір біл­­дірген еді. Алайда ХВҚ таң­дауы са­рап­шылардың болжамына тәуел­ді емес екені байқалды. Енді сарап­шылар ХВҚ-ға мүше мемлекеттер мен агенттіктер Алматыда жа­ңадан ашылған орталыққа қол­дау көрсетеді деп үміттеніп отыр.

АЛМАТЫ