Мемлекет басшысы Жамбыл облысындағы жағдайға байланысты мәлімдеме жасады

Құрметті қазақстандықтар!

Бүгін түнде Жамбыл облысы Қордай ауданында жергілікті тұр­ғын­дар арасында жаппай төбелес, жанжал болды.

Бұл ахуалды арандатушылар өз мақсатына пайдаланды. Өкінішке қарай, бұл оқиға кезінде адам шығыны болды.

Мен қаза болған азамат­тар­дың отбасыларына көңіл айтамын. Зар­дап шеккендердің тезірек сауы­ғып кетуіне тілек­теспін.

Қазір полиция мен Ұлттық ұлан бұл жағдайды бақылауға алды.

Осыған орай, мен Үкімет комис­сиясын құруды тапсырдым.

Оған Премьер-Министрдің орынбасары Бердібек Мәшбекұлы Сапарбаев төрағалық етеді.

Үкімет комиссиясы болған оқи­ғаның себебін анықтайды.

Жамбыл облысы әкімімен бірлесіп, қаза болған­дарды жерлеу, зардап шеккендерге көмектесу жұмыстарын ұйымдастырады.

Сондай-ақ жағдайды тұрақ­тандырумен айналысады.

Қоғамдық тәртіпті бұзғандар анық­талып, қатаң жауапқа тартылатын болады.

Бас прокуратураға, Ұлттық қауіп­сіздік коми­тетіне тиісті тапсырма бердім.

Мемлекетіміздің мүддесіне зиян келтіретін, береке-бірлігімізді бұзатын және жалған ақпарат таратқан азаматтар заң алдында жауап береді.

Мемлекеттік органдарға осы ауыр кикіл­жіңнің салдарын жою бойынша шұғыл шаралар қабылдау қажет.

Осыған байланысты мыналарды тапсырамын:

Бірінші, Премьер-Министрдің орын­басары Бердібек Мәшбекұлы Сапар­баевтың төрағалығымен Қордай ауда­нындағы оқиғалардың салдарын жою бойынша Үкіметтік комиссия құру.

Алдымен жанжалдың негізгі себеп­терін анықтау керек. 

Әлеуметтік-экономикалық жә­не гуманитарлық сипаттағы мә­селелерді жедел шешуді қамта­масыз ету қажет.

Үкіметтік комиссия Жамбыл облысының әкімімен бірлесіп қаза тапқандарды жерлеуді ұйымдастыруы, шығынның көлемін анықтап, зардап шеккендердің меншігін қалпына келтіру жоспарын қабылдауы тиіс.

Барлық қаза тапқандар мен жара­ланғандар­дың отбасына қажетті көмек көрсету керек.

Қазір тұрғындарды тыныштан­дыру маңыз­ды. Бұл жұмысқа беделді адамдар, сондай-ақ Қазақ­стан халқы Ассамблеясы тартылсын.

Екінші. Бас прокурорға Қордай ауданын­дағы оқиғаларды тексеруді ерекше бақылауға алу және бұл үшін ведомствоаралық жедел-тергеу тобын құру қажет.

Кінәлілер қатаң жазалануы тиіс.

Үшінші. Ұлттық қауіпсіздік ко­митеті, Бас про­­­куратура қажет­ті тергеу іс-шар­аларын жүр­гізіп, ұлт­ара­лық араздыққа шақыр­ған­­дарды, аран­да­ту­­шы­лық қауесет­тер мен жалған ақ­параттар тарат­қан­дарды жауапкер­шілікке тартулары тиіс.

 Қадірлі отандастар!

Бейбітшілік пен қоғамдық келісім – біздің мемлекетіміздің берік негізі.

Халқымыз қиын-қыстау замандарда өзінің біртұтастығын сақтап қалған.

Сон­дықтан біз кейбір азамат­тарға, соның ішінде арандату­шы­ларға еліміздің басты құнды­лығын – ынтымақ-бірлігімізді бұзуға жол бермейміз.

Бұл еліміздегі барша азаматқа ортақ тілек деп санаймын.

Азаматтарды жалған қауесет­терге бой алдыр­мауға, қоғамдық қауіп­сіз­дік­ті қамта­масыз ету жұмы­сын­да құқық қорғау органдарына көмек беруге шақырамын.

Мемлекеттік органдар туын­даған мәселе­лерді шешу үшін барлық қажетті шараны қабылдайды.