Түркия Еуроодақпен шекарасын ашты

Тапсырма берілген алғашқы күні-ақ 18 000 босқын мемлекеттен шығып үлгерді. Күн сайын 10 000-ға жуық адам шекара асып жатыр. «Анадолы» агенттігі бұл көрсеткіш­тің өсе беретінін болжап отыр. Өйт­кені қазіргі кезде Түркия үкіметі Сирияның солтүстік-шығысында әскери операция жүргізіп жатыр.

Ердоғанның айтуынша, елде шамамен 3,7 млн сириялық бар. Осыған орай Түркия Еуроодақты миграция­мен байланыс­ты келісімін орындамағаны­ үшін айыптап отыр. «Мем­лекет босқындар­ды бұдан артық асырай алмайды. Бізге миграцияға қатысты көмек беріл­мейді», дейді Р.Ердоған. Прези­дент бұған дейін де шекараны ашатынын хабарлаған болатын, алайда басқа елдер ол мәлімдемеге сене қоймады. Ол осынша босқындарды қабылдап, пана беруге міндетті емес екенін де ескертті. Түркияның Әділет және даму партиясының баспасөз хатшысы да миграция саясатына оң көзқарастағы мемлекет екенін, алайда бұдан былай Түркия босқындардың жаңа легін қабылдай алмайтынын мәлімдеді.

Босқындардың алғашқы тобы Түр­кия­ның Грекиямен шектесетін бөлігіне келіп, шекараның ашылғанын күтті. Мемлекет шеті тыныш емес. Түрлі қақ­тығыстар, полициямен жанжал да болып тұрады. Грекия тарапы да қарулы күштерін жұмыл­дырып, тіпті әскери техникаларын дайын­даған. Гре­кия үкіметінің мәліметіне сенсек, шекара ашылған күні 4 мың босқынды кері қайтар­ған. Түркияның Грекиядан бөлек Бол­гария­мен де шектесетінін ескерсек, дәл осындай жағдай Болгарияда да қайталанып жатыр.

Еуроодақ әзірге ешқандай жауап бермеді. Еуропалық БАҚ Брюссельде мәселенің талқыланып жатқанын хабар­лады. Дегенмен Франция Гре­кия мен Болгарияға шекараларын қор­ғауға көмектесуге әзір екенін жеткізді.

Грекия үкіметінің ресми өкілі Сте­лиос Петсас оқиға ұлттық қауіпсіз­дікке қауіп төндіріп тұр дейді. Ал Гре­кия премьер-министрі Кириакос Ми­цотакис шекараны заңсыз бұзбақ болғандарға шара қол­данылатыны туралы мәлімдеді.  «Гре­кия Сириядағы жағдай үшін жауап бермейді. Оған қатысы жоқ. Сондықтан олар үшін шығындалмайды», дейді үкімет басшысы. Сонымен қатар ол Германия канц­лері Ангела Меркелді, Еуроодақ­тың басшылығын, одаққа мүше мем­лекеттердің басшыларын орын алған жағдай туралы ескерткен.

Болгария Сыртқы істер министрі Краси­мир Каракачанов шекара­ға 1000 сарбаз мен техниканы жібе­ретінін, коронавирустың әсерінен тағы да бір миграциялық дағдарыс болады деген болжамын айтты.  

Түркия мен Еуроодақ 2016 жылы миг­ра­циялық дағдарысты тоқтату үшін серік­тестік орнатуға келіскен бола­тын. Одақ қаржылай көмек бере­тінін айтып, Анкара Еуропаға кетіп үлгерген сириялықтарды кері қайтаруға келісімін берді.

Ал Түркия мен Сирия арасындағы деп  «Көктем қалқаны» әскери опера­ция­­сы­нан кейін шие­леніс үдеп кетті. Ес­теріңізде болса, 28 ақпанда Анкара сирия­лық әскер соқ­қысынан түрік жауын­гері қаза тапқанын мәлімдеген бола­тын. Екі ел қақтығысына Ресей де қосылып, Су-24 бомбалаушысымен Кми­нас пен Найраб деп аталатын Сирия бекет­терін басып кірген түрік әскеріне соқ­қы жасады. Одан кейін Түркия Башар Асадтың парламенттік сайлау тура­лы мәлімдемесін қабыл­дамай отыр. Ан­ка­раның айтуынша, кезекті сайлау Сирия үшін де, Түркия үшін де, тіпті халық­ара­лық ұйымдар үшін де заңсыз болмақ.