Жауапкершілік бәрімізге ортақ

«Шектеу мен бақылау шаралары қауіпсіздік мақсатында күшейтіледі. Мысалы, автовокзалдарда қалааралық авто­бус­тардың қозғалысына тыйым салынды. Сондай-ақ, елорда ау­мағына кіріп-шығатын жер­лерде шектеу қойылады. Көлік­тің барлық түрлері кіріп-шыға­тын жерлерде коронавирус ин­фекциясын жұқтырды деп күдік келтірілген немесе жұқтыр­ған адамдарды анықтауға арнал­ған қосымша бекеттер орна­тылады. Карантин мен ко­мен­данттық сағатты шатас­тыр­мауға шақырамыз. Себебі карантин – ол шектеу қою. Яғни, қажет болмаған жағдайда адамдар көп шоғырланған жерлер­ге азаматтардың баруына шектеу қойылады. Ең алдымен, тәр­тіпке, одан кейін біздің нұсқауларымызды, Денсаулық сақтау министрінің нұсқауын қатаң ұстануға шақырамыз», деді ол.

Сонымен қатар ол азық-түлік дүкендері, машина жуатын жерлер мен дәріханалар ғана жұмыс істейтінін ескертті.

«Қаланың сауда, ойын-сауық орталықтарында азық-түлік дүкендері, машина жуатын жерлер мен дәріханалар ғана жұмыс істейді. Қалған сауда нүктелерінің бәрі уақытша жұмысын тоқта­та­ды. Қаладағы 12 ірі сауда, ойын-сауық орталықтары қазір уақытша жұмысын тоқтату туралы шешім қабылдады. Мысалға, Mega Silk Way-де жалға беріп жатқан орындарынан жалға беру құнын уақытша алмайды және қызметкерлерінің жалақысының 75 пайызын төлеуді қолдап отыр.

Біз өзге де ірі орталықтардың бас­шыларымен осы бағытта жұмыс істеп жатырмыз. Сонымен бірге, халыққа қызмет көрсету орта­­лық­тарының жұмысы уа­қыт­ша шектеледі. Қазіргі уақытта шұғыл мәселе болмаса, аталған орта­лықтарға барудың қажеті жоқ. Президент тарапынан бар­лық ұйым басшыларына қыз­меткерлердің 70 пайызын қашық­тықтан жұмыс жасауға немесе еңбек демалысына шығаруға ұсы­ныс жасалды. Осыны сақтауды сұраймыз. Бұл коммуналдық қызметкерлерге, құқық қорғау, арнайы органдарға, медицина қызметкерлеріне және қаланың тыныс-тіршілігін қамтамасыз ететін басқа ұйымдарға қатысты емес. Сауда, ойын-сауық орта­лық­­тарында, базарлар және ком­муналдық шаруашылық, тамақ өнеркәсібі, қоғамдық тамақтану орындарында, халыққа қызмет көрсету орталығында, вокзал мен әуежайда, қонақ үйлерде және басқа да орындарда санитарлық зарарсызданыру режімі күшейтілді. Медициналық тексеруден өтуге және емделуден бас тартқан, карантин режімін сақтауға бей-жай қарап, эпидемиологиялық жағдайды және басқа да жағ­дайларды анықтау үшін қолда бар мәліметті жасырған адамдарға жауапкершілік бар екендігін ұмытпауға шақырамыз. Қоғамдық тәртіпті сақтау үшін қала аума­ғын­да патрульдік бақылау күшей­тіледі», деді ол.

Және де қала басшысы қазіргі уақытта қаладағы сауда желі­ле­рінің қоймаларында 47 мың тонна әлеуметтік маңызды азық-түлік бар екенін айтты.

«Бұл қазіргі айлық норманы толықтай жабады. Айлық норма – 38 мың тонна. Ол қоймаларды азық-түлік тауарларымен қосым­ша толықтырамыз. Кеше елордаға 400 мыңға жуық маска жеткізілді. Алдағы уақытта тағы 1 млн мас­каға, антисептиктерге тапсырыс берілді. Қажет болған жағдайда апта ішінде жеткізіледі. Сондай ақ, ПИК-терге үйлердің кіре берістерін, есік тұтқаларын, бас­пал­дақ жақтауларын, лифті­лер­ді күніне екі мәрте зарарсыздандыру туралы тапсырма берілген. Барлық коммуналдық қызметтер күшей­тіл­ген жұмыс режіміне ауыстырылды және гигиеналық заттармен қамтамасыз етілді», деді А.Көлгінов.

Кеше сондай-ақ Алматы қала­сы­ның әкімі Бақытжан Сағынтаев та төтенше жағдайға байланысты енгізілетін карантин режімінің негізгі шаралары мынадай болатынын айтты: 

- Мегаполисте өзін өзі оқ­шаулау және үй карантині меха­низ­мдері арқылы эпидемияға қар­сы ауқымды іс-шараларды жүр­гізу.

- Көшелерді, тротуарларды жуу және дезинфекциялау арқылы жұқтыру орындарын бұғаттау.

- Қоғамдық орындарда, тұр­ғын үйлерде санитарлық-эпи­де­миялық дезинфекцияны күшейту және іргелес аумақтарды санитарлық тазалау.

- Азаматтар мен автокөлік құ­рал­дарының Алматы қаласы аумағына кіруін/шығуын шектеу.

- Алматы қаласына кіре­бе­ріс­тер­де 27 блок бекеттерін орнату.

- Блок бекеттерінде Патрульдік полиция полкінің, ЖӘАТ-ның, «Гранит» полкінің, Қорғаныс ми­нис­­трлігі мен Ұлттық ұлан бө­лім­­шелерінің күштері жұмыл­ды­рылады.

- Сонымен бірге қалаға бірінші қажеттіліктегі тауарларды, азық-түлік өнімдерін, дәрі-дәрмектер мен медициналық өнімдерді, жеке қорғану және гигиена құралдарын әкелу үшін «жасыл дәліз» жүзеге асырылады.

- Карантин кезеңінде азық-түлік емес сауда нарықтары, азық-түлік өнімдері мен дәрілік заттарды сататын орындардан басқа, ірі сауда, ойын-сауық орталықтары мен сауда үйлерінің жұмысы тоқтатылады.

«Біз тұрғындарға алматы­лық­тардың карантин талаптарын білуі, қаладан уақтылы шығуы және кіруі үшін бұқаралық ақпа­рат құралдары, әлеуметтік желі­лер және мессенджерлер арқылы толық және жүйелі түрде ақпа­рат­тар беріп отырамыз. Коро­на­­вирусқа қарсы қалалық штаб туын­даған мәселелерді жедел қарап, шұғыл шаралар қабыл­дай­тын болады», деді әкім.