Облысымыздың Бұқар жырау атындағы Әдебиет және өнер музейінің экскурсия жүргізушісі Мағзия Қайырбекқызы Мәдениет және спорт министрлігінің қолдауымен «Kazakh Tourism» ұлттық компаниясы өткізген «National Tourism Awards» ұлттық байқауына шақырылды. Музейде 30 жыл бойы қызмет етіп келе жатқан маман үшін бұл қуанышты жаңалық болды.
Байқаудың мақсаты – ішкі және сыртқы туризмді дамыту. Қатысушылар «Жылдың үздік туристік компаниясы», «Үздік гид-экскурсия жүргізушісі», «Үздік қонақүй», «Үздік шипажай», «Балалар мен жасөспірімдер туризмі», «Туризм туралы үздік блог» сияқты аталымдар бойынша бақ сынады.
– Байқаудың шарты бойынша, қатысушылардың «Гид-экскурсия жүргізушісі» деген лицензиясы болуы керек. Мен туристерге, өңірге келетін қонақтарға Павлодардан Баянауылға дейінгі 220 шақырымдық жолда Мәшһүр Жүсіп атамыздың ерекше құбылысты адам екені, ғұламаның соңында қалған бай шығармашылық мұрасы жайлы экскурсия барысында баяндап айтып жүрдім. Сондықтан, байқаудың «Үздік гид-экскурсия жүргізушісі» бағыты бойынша «Мәшһүр туралы сөз» деген жұмысымды жіберген едім. Қазылардың назарына түсіп, таңдаулы үштіктің қатарына іліндім, – дейді Мағзия бізбен әңгімесінде.
Айтуынша, алғашқы гидтік жолы 2006 жылы басталған. Осы жылы Баянауылдағы Ескелді шатқалында Мәшһүр Жүсіптің кесенесі ашылады. Облыстық Туризм және спорт департаменті кесенеге ұйымдастырылатын экскурсия жүргізушілігіне ұсыныс жасайды. Содан бастап, өңірге келетін басқа да ақпараттық турлар, турфирмалардың ақпараттық экскурсияларына гид болған екен.
– Экскурсия жүргізушісі –үзіліссіз сөйлеуді, аудиторияға бейімделуді үйреніп, жаңадан ақпараттар меңгеруі өте қажет. Үзіліссіз сөйлеу көп оқуды, рухани, тарихи, әдеби білімділікті қажет етеді. Шыдамдылық, дикцияның таза болуы, аудиторияға тез арада бейімделіп, мәтінді тез меңгере алу керек, – дейді Мағзия.
Көптеген туристен бөлек, өңірге жұмыс сапарымен келген Ресей елшісі Михаил Бочарниковтің Баянауылға сапарына экскурсия жүргізушісі болған.
– Елші мырза бізді аса қызығушылықпен тыңдады, ара-арасында мені тоқтатып, бірнеше сұрақ қойды. Сұрақтардың жауабы санамда тұр ғой жаңғырып. Өйткені әдебиет және өнер музейінде қалың құнды жәдігерлер мен экспонаттардың, шежіренің, қазақтың ұлы тұлғалары қалдырған аманаттың ортасында жүрмін. Өзімнің ұлттық гид екенімді көрсеткеніме қатты қуандым, – дейді Мағзия еске алып.
М.Қайырбекқызы өз кезегінде қазақ жастары көп осы бір мамандыққа бейімделсе деген тілегін айтады. «Өзге жұртқа елінің тарихы мен мәдениетін, әдебиетін, өнерін, ұлыларын таныстыру – ата-баба аманаты, үлкен құрмет пен зор мәртебе. Тарихи энциклопедиялар мен ғылыми әдебиеттер, мақалаларды көп оқу керек. Тарихи фильмдер көруге де кеңес берер едім», дейді.
Біздің елімізде қазір музей туризмі жанданып келеді. Қай елде болмасын, туристер, турфирмалар өкілдері келетін болса, әуелі музейлерге апарады. Гид атанған музей қызметкері – әрі тарихшы, әрі мәдениеттанушы, этнограф, географ, археолог болып кетеді.
Ал өңірімізге жаз басталысымен-ақ, Баянауыл, Қалмаққырылған, Маралды, Ертіс ауданы, Ақкөл-Жайылма жаққа әулиелер кесенелері тұрғызылған жерлерге тағзым етуге туристер, басқа да қонақтар көптеп келетіні белгілі. Облыс орталығының өзі өткен тарихы, шежіресі жетерлік көне ғимараттарға толы.
Мағзия Қайырбекқызы қазір де Екібастұздың Ақкөл-Жайылмадағы Исабек ишанның, Шарбақты ауданындағы Ғабдылуахит хазіреттің кесенелеріне алып баратын, өңірдегі басқа да туристік бағыттардың экскурсия жүргізушісі қызметін жалғастыруда.
ПАВЛОДАР