Бүгінгі таңда дәрі-дәрмек жасайтын отандық өндірісшілердің алдына жаңа міндеттер қойылды. КВИ мен вирусты пневмонияға шалдыққан науқастарды емдеу кезінде өзімізде шығарылатын препараттар түрлері мен көлемінің үлесі шектеулі екені белгілі болды. Дегенмен ауызды қу шөппен сүрте берудің де жөні жоқ секілді. Өйткені қазір елімізде індетті ауыздықтаудан туындайтын аса жауапты да күрделі міндеттерді атқару үшін қажетті дәрі-дәрмек өндірісі көлемін өсіріп отырған отандық кәсіпорындар да бар. Солардың бірі – Ақтөбе қаласындағы «ТК Фарм-Ақтөбе» ЖШС.
Дәрі-дәрмек шығаратын кәсіпорынның іске қосылу кезеңі 2014 жылдан басталады. Зауыт құрылған күннен бері халықаралық стандарттарға сәйкес өнім өндіріп келеді. Зауытта шығарылатын дәрі-дәрмек түрлері жеткілікті. Оның бәрі де мемлекет пен халықаралық өкілетті ұйымдардың берген рұқсаты бойынша жасалып, республика өңірлеріндегі шағын дәріханалар жүйесіне жөнелтіледі.
Қазіргі кезде КВИ мен пневмонияны емдеуге қажетті препараттар мен дәрілік заттарға сұраныс күрт өсіп кеткені белгілі. Осы ретте «ТК Фарм-Ақтөбе» компаниясының құрылтайшысы, әрі бас директоры Жанагүл Төреханова өзі басқаратын зауыттың дәрі-дәрмек сұранысын өтеуге үлес қосуға әлеуетті екенін айтты.
«Коронавирустың да, өкпе қабынуының да түп-төркіні бір. Екеуі де қас пен көздің арасында вирус арқылы жұғып тез таралады. Міне, бізде осындай вирусқа қарсы қолданылатын дәрілердің бірнеше түрі шығарылады. Тапсырыс берушілер оның таблетка түріндегі қорабын қалай ма, әлде сұйық түрін ыңғайлы көре ме, қай-қайсына да тиісті тапсырысқа сәйкес жасауға мүмкіндігіміз бар. Соның ішінде қазір біздің технологтардың күшімен өндіріске қосылған грипповер деп атау берілген дәрі түрі бар. Оның жөтелді басуға тигізетін әсері мол. Аталған препараттың басты құрамы өсімдік пен шөптен тұрады. Сондықтан біз оның шикізатын арнайы сертификаттары бар дәрілік шөптер жинайтын компаниялардан сатып аламыз. Оның өзі тектес өзге отандық химиялық препараттардан артықшылығы ағзаның өзге мүшелеріне кері әсерін тигізбейді. Сондай-ақ біздің компанияда өндірілетін індеттен қорғануға қажетті антисептикалық құралдар мен бірқатар медициналық бұйым бүгінде отандастарымыздың қажетіне жарап жүргенін айтқым келеді», деді Жанагүл Жәйлібекқызы.
Біз сөз етіп отырған кәсіпорынның материалдық-техникалық базасы әлемдік талаптарға сай жабдықталған. Зауыттың химиялық зертханасы бар. Мұнда кәсіби біліктілігі жоғары, өз ісінің қыры мен сырын жетік білетін технолог мамандар қызмет етеді.
Індеттің тыйылмай, одан әрі өршуінен зауыттағы дәрі-дәрмек өнімдеріне түсетін тапсырыс екі-үш есеге дейін өскен. Кәсіпорын осынау қысылтаяң шақта қаңтарылып қалмай, тапсырыстың бәрін орындауға ұмтылып бағуда. Бұл зауыттан шығарылатын препараттардың басым бөлігі дистрибьютерлік компаниялар арқылы еліміздегі шағын дәріханаларға жіберіледі. Сонымен қатар отандық өнімдер көтерме бөлшек сауда орталықтарына да жөнелтіліп жатыр.
Мемлекет басшысы Қасым-Жомарт Тоқаев Қазақстан халқына арнаған Үндеуінде КВИ-ді емдеуді одан әрі жетілдіру жөнінде бірнеше міндетті атап көрсеткені белгілі. Соның ең бастысы отандық тауар өндірушілер жаңа препараттарды шығаруына қатысты жүргізілетін тіркеу үдерістерін жеделдету болып отыр.
«КВИ-ді емдеуге қатысты препараттарды былай қойғанда, жоспарлы түрдегі дертті емдеуге қолданылатын дәрілерді сынақтан өткізуге әрі өндірістік жолға қоюға үш-төрт жыл уақыт кетеді. Осындай қатаң талаптар жағдайында КВИ-ді емдеуге қажетті препараттарды тіркеу тым күрделі үдеріс екенін аңғару қиын емес. Солай бола тұрса да бұл үдерісті жеделдету қажет екені түсінікті. Отандық дәрі-дәрмек өндірісінің өкілдері Президенттің бұл ұсынысын толығымен қолдайтынына сенімім мол. Бұдан басқа жолды табу қиын-ақ. Індет ырғалып-жырғалуды, уақытты зая өткізуді көтермейді. Отандық тауар өндірушілердің жаңа препараттарды шығаруына қатысты тіркеулер жеделдетілсе, елімізге импорттық жолмен ағылып жатқан дәрі-дәрмек бағасы төмендейді. Екіншіден, қолжетімділік деңгейі өседі. Үшіншіден, бұл қадамның елімізде дәрі-дәрмек қауіпсіздігін қамтамасыз етуге де қосатын үлесі қомақты деп санаймын», деді «ТК Фарм-Ақтөбе» компаниясының бас директоры.
АҚТӨБЕ