17 қазанда Германияның Дюссельдорф қаласында өтетін кәсіпқой бокс кешінде 31 жастағы қазақстандық Жан Кособуцкийдің кіммен жұдырықтасатыны белгілі болды.
Аса ауыр салмақта күш сынасып жүрген Жан кезінде әуесқойлар арасында да табысты өнер көрсеткенін жанкүйерлер жақсы біледі. Ол – Қазақстанның үш дүркін чемпионы және екі дүркін жүлдегері. 2013 жылы жерлесіміз Дүниежүзілік Универсиадада күміс медальді мойнына ілді. 2017 жылдан бері кәсіпқой рингте бақ сынап жүр. Сол аралықта 14 рет шаршы алаңға көтерілген Кособуцкий барлық жекпе-жегінде жеңіске жетті. 13 қарсыласын нокаутқа жіберді.
Отандасымыздың қарсыласы да осал емес. 31 жастағы АҚШ боксшысы Джеймс Маккензи Моррисон 19 кездесу өткізіп, 17 рет ұтты. 15 бәсекені ол мерзімінен бұрын аяқтады.