Шахматтан Қазақстанның ерлер және әйелдер құрама командалары 10 қазанда Азия шахмат федерациясы ұйымдастыратын Азия ұлттары кубогі (Asian Online Nations Cup) жарысына қатысады. Жарыстың жүлде қоры – 20 000 АҚШ доллары.
Азия ұлттары кубогі – Азияның ұлттық құрамалары арасында өткізілетін жылдың ең ірі жарысы саналады. Әр екі жыл сайын өткізілетін биылғы бәсекеге Қазақстан ерлер құрамасынан Ринат Жұмабаев, Рүстем Хуснутдинов, Муртас Қажғалеев, Әнуар Есмағамбетов және Денис Махнев, ал қыздар құрамасында Бибісара Асаубаева, Гүлісхан Нақбаева, Гүлмира Дәулетова, Әсел Серікбай және Меруерт Қамалиденова бақ сынайды.
Еске сала кетейік, 2016 жылы Әбу-Дабиде (БАӘ) өткен Азия ұлттары кубогінде қазақстандық шахматшылар классика жарысында құрлықтық біріншіліктің қола медалін жеңіп алды. 2018 жылы Хамадандағы (Иран) додада ерлер құрамасы төртінші орынға, әйелдер құрамасы бесінші орынға табан тіреді.