Топ тағдыры шешілер турлар алда

Шыны керек, матч алдында Албания құрамасы ойынның сөзсіз фавориті саналған. Футбол мамандары да Албания үш ұпай иеленеді деп болжаған еді. Бірақ Қазақстан құрамасының ойыншылары Балқан түбегінің еліне лайықты қарсылық көрсетіп, жеңіске жетуі былай тұрсын, гол соғуға мүмкіндік берген жоқ. Алматыдағы ойында екі ұжым­ның да басты мақсаты – үш ұпай олжалап, турнир кестесінде топ бастау еді.

Кешегі ойында жерлестеріміз нашар өнер көрсетті деп те, же­ңіске лайық болды деп те ай­та ал­маймыз. Бірақ шабуыл ұйым­дас­тырып, гол соғу мүм­кін­дігін жа­рату бойынша Албания құра­масына жол бергеніміз анық. Мә­селен, ойын­ның 60-минутында қар­сы­лас команданың ойыншы­сы қақпашымыз Стас По­катиловтің үстіне асыра сал­ған добына абырой болғанда қорғаушы Те­мір­лан Ерланов бірінші жетіп, қақ­памызды 100 пайыз­дық голдан аман сақтап қал­ды.

Сондай-ақ Албаниямен өткен ойында белгілі себептермен матчқа қатыса ал­маған негізгі құрамның футболшылары Бауыржан Исламхан, Нұрәлі Әліп, Ян Вороговскийдің орындары әбден білінді. Алдағы Бела­русь құрамасымен өтетін ойынға Нұрәлі Әліп пен Ян Во­ро­говский қатыса алмайды. Ал Ис­ламханның жағдайы белгісіз. Сондай-ақ кешегі кездесуде сары қағаз алған Ғафуржан Сүйімбаев та құрамаға көмектесе алмайды.

Бас бапкер Михал Билек те Ал­баниямен өткен матчтың нә­тижесі көңілінен шыққанын жә­не қорғаныста ойыншылардың тапшы болғанын айтты. «Бізде қорғаныста ойыншылар мәселесі туындады: Вороговский, Әліп, Малый түрлі себеппен бұл ойынға қатыса алмады, ал Марочкин жа­рақат алып қалды. Бірақ алаң­ға шыққан қорғаушылар жақ­сы ойнады. Мен оларға ризамын. Қақпамызға гол өткізіп алма­ғанымызға көңілім толады. Ал бізде гол соғатын мүмкіндік көп болмады», деді Билек.

Ал Албания құрамасының бас бапкері италиялық маман Эдоардо Рея да тең ойынға риза екенін жеткізді. «Бәрі жақсы. Төрешілер кейде қателіктер жі­береді. Ойын алдында мен қат­ты алаңдадым. Өйткені төреші бұған дейін өткен бір матчта 12 сары қағаз көрсеткен болатын. Ме­ні осы жағдай қатты мазалады. Қазақстан құрамасы біз үшін біраз қиындық туғызды. Бірақ маған команданың ойын мәнері ұнады. Біздің топтағы барлық команданың деңгейлері шамалас. Дегенмен физикалық жағынан жақсы дайындалған құрама бірінші орын иеленді», деді Эдоардо Рея.

Топтағы екінші ойында Литва өз алаңында Беларусь құрамасын қабылдап, 2:2 есебімен тең ойнады. Енді С дивизиондағы келесі тур ойындары 14-15 қазанда өтеді. 14 қазанда Албания сырт алаңда Литва құрамасымен, 15 қазанда Қазақстан қонақта Беларусь футболшыларымен ойнайды. Топта топ бастайтын команданың тағдырын осы төртінші тур шешеді.

Биылғы Ұлттар лигасының іріктеу кезеңін сәтті бас­та­ған жерлестеріміз осылайша үш турдан кейін топтың кө­шін бас­тап тұрғаны қуантады. Әрине бөркімізді аспанға атуға әлі ерте дерсіз, бірақ әзірше мақ­танышпен айтуға болатын шы­ғар?! Қазақстан құрамасының ең кейінгі рет өз тобында үш матчтан кейін қашан бірінші орында тұрғанын ұзақ ойланып, есімізге түсіре алмадық.