Құрлықтық хоккей лигасының (ҚХЛ) кезекті тур ойынын «Барыс Аренада» өткізген елорданың «Барысы» «Йокерит» (Финляндия) командасынан овертаймда жеңіліп қалды.
Жалпы спортта жеңіс пен жеңілістің қатар жүретіні белгілі ғой. Бірақ «Барыстың» кешегі жеңілісі командаға да, жанкүйерлерге өте ауыр тиді. Матч бойы ойын жағынан да, гол соғу бойынша да қарсыласынан алда тұрып, кездесу соңында жеңіліп қалу қашан да оңайға соқпайтыны белгілі. Ойынның үшінші кезеңінің басында 4:0 есебімен алда тұрған жерлестеріміз айналдырған 15 минуттың ішінде 4 шайба өткізіп алды.
Алғашқы 20 минутта екі команда бір-бірінің қақпасына шайба соға алмағанымен, біздің жігіттер кездесуді тамаша бастады. Алғашқы минуттан шабуыл шебінде сенімді ойын көрсетті. Үзілістен кейін іске кіріскен «Барыс» хоккейшілері ә дегеннен екі шайба соғып, екінші кезеңді сәтті бастады. Кездесудің есебін 25-минутта «Барыстың» төртінші төрттігінде өнер көрсететін Егор Петухов ашты. Арада 12-минут өткенде Аркадий Шестаков мергендігімен көзге түсіп, таблодағы көрсеткішті еселей түсті. Екінші кезеңді жеңіспен түйіндеген жерлестеріміз үшінші кезеңнің алғашқы 5 минутында білгенінен жаңылған жоқ. 42 және 44 минуттарда «Барыстың» швециялық екі легионері қатарынан екі шайба соғып, есепті 4:0-ге жеткізді. Бұл голдардың авторлары – Якоб Лилья мен Линус Виделль.
Төртінші голдан кейін жерлестеріміз жеңіске жететініне сенімді болып, мұзайдында өздерін еркін ұстай бастады. Осының салдарынан «Йокерит» тарапынан голдар шеруі басталды. Алғаш Петер Регин мергендігімен көзге түссе, кейіннен дубль авторы атанды. Сонымен қатар Томми Кивистё мен Микко Лехтонен бір-бірден шайба соқты. Ал қосымша уақытта Давид Скленичка «Барыс» қақпасын дәл көздеп, командасына тамаша жеңіс сыйлады.