Түркістан облысы Келес ауданына қарасты Бозай ауылының тұрғыны Талғат Әділханов шағын трактор құрастырып шықты. Жағымды жаңалықты естіген бойда Келес ауданы әкімдігінің баспасөз қызметі арқылы өнертапқышпен хабарластық.
Ауыл шаруашылығына қолайлы бұл техникасын ол бірнеше көліктің жиынтығынан құрапты. Тракторға «Жигулидің» қосалқы бөлшектері мен «Ниваның» қозғалтқышын орнатқан. Алдағы уақытта Талғаттың тракторға қосымша тіркемелер жасап шығармақ ойы бар. Жоспары жүзеге асса, ол ауыл шаруашылығы жұмыстарына пайдаланылып, шаруаның қолын ұзартатыны анық.
«Бұл техниканы жасаудағы мақсат – үй іргесіндегі бау-бақшалық жерлерді жырту, егін егуге дайындау, қол күшін жеңілдетіп, еңбек тиімділігін арттыру. Соқаға қоса, сүргіш құрылғысын қойып жатырмын, бұйыртса бұл трактормен малдың қиын тазалауға да болады. Көлік жөндеуге бала жасымнан қызықтым. Енді соны кәсіп етіп, нәпақа айырып отырмыз. Атам да, әкем де темір ұстасы болған жандар. Солардың ізімен келе жатырмын», дейді Талғат Асанханұлы.
Өнертапқыш жігіт туралы ауылдастары да жылы пікір білдірді. «Талғат техниканың тілін біледі. Жеті атасынан бері қарай Ердәуіттің темір ұста дүкенін ұстап келе жатқан жандар. Ауыл тұрғындарының бәрі техникасын осы інімізге алып келіп, жөндетеді. Қолақысы да қымбат емес. Ұсақ-түйек жұмыстарын тегін істеп беретіні бар, қол-қайыры да аз емес», дейді ауыл ағасы Тәттібек Әдеев.
Әтіргүл ТӘШІМ,
журналист