Өмір болған соң сан түрлі тағдыр, алуан түрлі оқиға болады. Күні кеше айрылмастай болып қосылған жандардың уақыт өте келе көңілі жараспай, арманы ұштаспай ажырасып жататындары жанға батады. Басқасы басқа, мұндай кезде жаутаңдап қалған жазықсыз баланы аяйсың. Себебі, барын баласына шашып үйренген адамдардың өзі ажырасқан соң жауапкершіліктен жалтарып, алимент төлеуден бұлтарып жататыны бар.
Еліміздегі елеулі істердің бірі – мемлекеттік қызметтер көрсетуді оңтайландыру, оны басқа бағытқа сала отырып, дамыту. Бүгінде халықаралық тәжірибеге сүйене отырып мемлекеттің бірқатар функциялары жеке салаларға берілуде. Осыған орай, құқық қорғау саласында да бірқатар өзгерістер орын алып жатқаны белгілі. Бұл ретте «ANTIKOR LIVE» жобасы аясында «Шығыс – Адалдық алаңы» жобалық кеңсесінің ұйымдастыруымен Шығыс Қазақстан облысы Әділет департаменті басшысының орынбасары Ермек Қорабаев қатысқан «Әлеуметтік маңызы бар мәселелер: алименттер мен еңбекақыны өндіру» тақырыбында тікелей эфир өтті.
«Алимент – «Неке және отбасы» Кодексіне сәйкес, бір адамның оны алуға құқығы бар басқа адамға ұсынылатын міндетті ақшалай немесе материалдық асырау қаражаты. Бұл – заң жүзінде бекітілген төлем. Ата-аналар мен балалардың арасында туындайтын ең өткір сұрақтардың бірі – осы алимент төлеу. «Алимент» деп біз көп жағдайда тек ажырасқан әкенің өз баласына төлеуге міндетті ақысын айтамыз. Алайда – бұл төлем тек әкеге ғана емес, сонымен қатар анаға да жүктелетін міндет. Баланы асырау – ата-анасының заңмен бекітілген міндеті. Ал алимент өндіруге келгенде ата-анасының некеде болуы, азаматтық некеде немесе ажырасқан болуы мүлде маңызды емес», дейді департамент басшысының орынбасары.
Оның айтуынша, қамқорлықтағы немесе патронаттық тәрбиедегі балалармен қатар асырап алынған балалар да алиментке құқылы. Ажырасу барысында ерлі-зайыптылар баланы асырау мәселесін өздері келісуі керек. Алименттер сол келісім бойынша төленеді. Егер ондай келісім болмаса, онда Қылмыстық кодекстің 139-бабына сәйкес кәмелетке толмаған балаларға алиментті ата-анасы сотпен төлетеді.
«Алименттер ай сайын ата-анасының еңбекақысынан немесе өзге табысынан заңмен белгіленген мөлшерде төленуі тиіс. Атап айтқанда, 1 балаға – табысының төрттен бір бөлігі, 2 балаға – табысының үштен бір бөлігі, 3 және одан да көп балаларға – табысының тең жартысы төленеді. Жұмыс істемейтін борышкердің төлеуге міндетті алимент мөлшері Қазақстандағы орта жалақы мөлшерімен есептеледі», деді Е.Қорабаев. Сонымен қатар тікелей эфир барысында департамент басшысының орынбасары еңбекақыны өндіру мәселелеріне тоқталып, заңда көрсетілген талаптарды атап өтті.