Бұл күнде аурудың түрі көп. Дегенмен бүгінгідей медицинаның дамып, дәрігерлердің біліктілігі артқан уақытта көптеген дерттің емі табылуда. Адам өмірін сақтап қалу мақсатында мемлекет тарапынан да тиісті мүмкіндіктер жасалуда. Жуырда Алматы қаласында орналасқан орталық клиникалық аурухана нейрохирургия бөлімінің меңгерушісі, белгілі нейрохирург, елімізде өткен «100 жаңа есім» жобасының жеңімпазы Мыңжылқы Бердіқожаев Тараз қалалық көпбейінді ауруханасына келіп, «Ми тамырларының аневризмасы мен артериовенозды мальформациясын емдеу» тақырыбында шеберлік сабағын өткізді.
Жиында аталған қауіпті дертті емдеудің әдіс-тәсілдері талқыланды. Бұл шара Тараз қаласында алғаш рет өткізіліп отыр. Мыңжылқы Бердіқожаев аурухананың рентгенэндоваскулярлы хирургі Қанат Қуандықұлы мен нейрохирург дәрігер Алмас Кұралбаевпен бірігіп, арнайы ангиографиялық кабинетте Тараз қаласының 24 жастағы тұрғынына ота жасады.
Ота жасалған жігіт қалалық көпбейінді ауруханасына церебровоскулярлық ауру түрімен ауыр дәрежедегі қайталанған геморрагиялық инсульт, оң жақ маңдайдағы жедел миішілік гематома, артериовеноздық мальформация диагнозымен ауыр халде түсіпті. Бұрын мұндай науқасқа шалдыққандар ота жасату үшін еліміздегі арнайы клиникалық орталықтарға немесе шет мемлекеттерге баруға мәжбүр болатын. Енді мұндай науқас түрін Тараз қаласында да емдеуге мүмкіндік туып отыр. Алғаш рет ұйымдастырылған шеберлік сабағында Жамбыл облысының дәрігерлеріне отаның әдіс-тәсілдері, одан кейінгі күтім, ем-шара жолдары туралы айтылып, тәжірибелік ота көрсетілді.
«Мұндай аурумен ауыратын науқастардың 17-40 пайызы ұстама болып, есінен танып, құлап қалу жағдайына көп ұшырайды. Аяқ-қолдары жансызданады. Эпилепсиялық ұстамалар сезімталдықтың бұзылуы, жүректің соғуы, бет әлпеті арқылы да көрінуі ықтимал. Сәтті өткен отадан науқас айығып кетуі әбден мүмкін», дейді М.Бердіқожаев.
Тараз қалалық көпбейінді ауруханасының бас дәрігері Нұрлан Әбілдаевтың айтуынша, артериовеноздық мальформация – мида немесе жұлында ретсіз түрде, айқаса орналасқан тамырлардың шумағы тәрізді туа біткен тамырлы патология. Бұл тамырлардың қабырғасы қалыпты жағдайдағы тамырларға қарағанда өте жұқа болғандықтан, олардың жарылып кетуі мүмкін екен. Сонымен қатар ми мен жұлынның артериовеноздық мальформациясы сирек кездесетін нозологиялық ақау болып табылады. Алайда дер кезінде мұның алдын алмаса, дәрігерлер күрделі неврологиялық бұзылыстар мен өлім жағдайына алып келуі мүмкін екенін ескертеді. Оның ең жиі кездесетін және қауіпті клиникалық көріністері – бас ауруы, ұстамалар, қан кету. Ал уақыт өткізіп алған науқастардың 50 пайызы мүгедектікке шалдығуы ықтимал. Дегенмен білікті дәрігерлер жұмысының нәтижесінде мұндай науқас түріне Тараз қаласында алғаш рет жасалған ота сәтті өтті. Енді алдағы уақытта да мұндай аурумен ауырған азаматтардың Тараз қалалық көпбейінді ауруханасында емделуге мүмкіндігі бар. Ол үшін барлық мүмкіндіктер қарастырылған.
Жамбыл облысы