Құрманғазы ауданының полиция қызметкерлері ресейлік тұрғынның екі елдің азаматтығымен жүргенін анықтады, деп хабарлайды Egemen.kz.
"Бұрынғы атыраулық 1999 жылы отбасылық жағдайына байланысты Ресей Федерациясына көшіп кеткен. Ол 2000 жылы сол елдің азаматтығын қабылдаған. Бірақ бұл туралы тиісті орындарға хабарламаған", деп мәлім етті облыстық полиция департаментінің баспасөз қызметінен.
Қазақстан Республикасы мен Ресей Федерациясының төлқұжаттарымен жүрген бұл азаматқа қатысты Құрманғазы ауданы полиция қызметкерлерімен ҚР Әкімшілік құқықбұзушылық туралы Кодексінің 496-бабының 2-бөлігімен (Шетел азаматтығын алу фактісін хабарламау) әкімшілік хаттама толтырылды. Жинақталған құжаттар Құрманғазы аудандық сотына жолданып, 200 айлық есептік көрсеткіш мөлшерінде айыппұл салынды.