...Орталық коммуникациялар қызметіндегі брифингке қатысқан Табиғи монополияларды реттеу комитетінің төрағасы Асан Дарбаев осылай деді. Яғни тарифтерге қатысты өзгеріс күтіліп отырған жоқ.
Оның айтуынша, осы жылдың қаңтарында халық үшін тарифтердің өсуі тежелді. Әйтпесе, коммуналдық қызметтер тарифінің орташа жоспарлы өсімі 15,5 пайызды құрауға тиіс еді. Мемлекет басшысының тапсырмасына сәйкес қабылданған шаралардың нәтижесінде тарифтердің өсуі 2019 жылғы қаңтармен салыстырғанда республика бойынша орта есеппен 0,5 пайызды құрады. Тек электрмен жабдықтауда ғана 5 пайыздық өсім тіркелген. Бұған стансалардың шекті тарифтерінің орта есеппен 15 пайызға өсуі себеп болған.
– Комитет тарифтердің өсуін тежеу үшін 400-ден астам монополистің қызметіне талдау жүргізді. Соның нәтижесінде барлық өңірдегі субъектілерге жалпы сомасы 16,4 млрд теңгеге уақытша өтемдік тарифтер бекітілді. Бұдан бөлек, басым бағыттары жоқ монополистердің жекелеген шығыстары 10,4 млрд теңгеге оңтайландырылды. Осылайша, халық шамамен 27 млрд теңге үнемдейді, – деді ол.
Комитет төрағасының айтуынша, биылғы төтенше жағдай кезінде тарифтер орта есеппен 7,4 пайызға төмендеген. Сөйтіп, бір айда тұтынушылар 1 млрд теңге үнемдеді.
– Президент тапсырмасына сәйкес 1 сәуірден бастап төтенше жағдай және карантин кезеңінде республика бойынша сумен жабдықтау тарифі 8 пайызға, су бұру тарифі 9,3 пайызға, жылумен жабдықтау тарифі 7,6 пайызға, электрмен жабдықтау тарифі 5 пайызға төмендеді, – деп нақтылады Асан Дарбаев.
Сонымен қатар төтенше жағдай кезінде монополистерге қарызы бар тұтынушыларды коммуналдық қызметтерден ажыратпау ұсынылды.
Монополист демекші, оларға осы жылдың он айында 1,11 млрд теңге көлемінде айыппұл салынған. Оның жартысына жуығы төленіп, мемлекеттік қазынаға түскен. Жалпы, жыл басынан бері табиғи монополиялар саласындағы заңнаманы бұзғаны үшін монополистерге қатысты 412 қаулы шығарылған.
– Азаматтық істердің жалпы саны 267-ні құрады. Оның 77 пайызы комитеттің пайдасына шешілді. Заңды және жеке тұлғалардан келіп түскен өтініштерді қарау аясында монополистерге қатысты жоспардан тыс 66 тексеру жүргізілді. 42 жағдайда бұзушылықтар анықталды. Тиісінше, олар әкімшілік жауапкершілікке тартылды. Өтініштерді талдау бойынша заңнаманы бұзу туралы 319 ұйғарым шығарылды. Оның 213-і орындалды, – деді комитет төрағасы.
Бұл ретте, қызмет көрсетуші компаниялар инвестициялық бағдарламаларды жүзеге асыратыны белгілі. Комитет олардың орындалуын бақылауға ерекше көңіл бөледі. Субъект тарифті алған соң жаңғырту және дамыту бойынша белгілі бір міндеттемелерді орындамаған жағдайда Табиғи монополияларды реттеу комитеті өтемдік тариф енгізе алады. Яғни игерілмеген қаражатты тұтынушыларға қайтаруы керек болады.
– Былтырғы субъектілердің тарифтік сметалары мен инвестициялық бағдарламаларының орындалуына талдау жүргізілді. Нәтижесінде, кейбір міндеттемелердің орындалмағаны анықталды. Осыған байланысты бүгінде республика бойынша 12,4 млрд теңгеге 300-ден астам субъектіге уақытша өтемдік тарифтер бекітілді. Оның ішінде тарифтік сметаны орындамағаны үшін – 9,08 млрд теңге, инвестициялық бағдарламаларды орындамағаны үшін 3,34 млрд теңге белгіленді. Өз кезегінде бұл 12 аймақтағы тарифтердің төмендеуіне әсер етті, – деді Асан Дарбаев.
Сондай-ақ жылу беру кезеңіндегі сыртқы ауаның нақты температурасын ескере отырып, жыл сайын артық төленген ақша қайтарылады. Өткен жылыту маусымының қорытындысы бойынша тұтынушыларға 737 млн теңгеге жуық қаржы қайтарылған.