БҰҰ-ның Халықты қоныстандыру қоры (ЮНФПА) ұйымдастырған «Әйелдер COVID-19 қарсы күрестің алдыңғы шебінде» фотокөрмесі Республика сарайында өтіп жатыр. Көрмеде қазақстандық дәрігерлер, еріктілер, заңгерлер, құқық қорғаушылар мен белсенділер жайында фотосуреттер мен бейнелер галереясы ұсынылған.
Жоба идеясының авторы – актриса, белсенді және «Бөпe» отбасы мен неке институтын жаңғырту қорының негізін қалаушы Айнұр Ильясова. Жобаның шығармашылық тобына фотограф Бауыржан Бисмильдин, видеограф және режиссер Ваня Абрамов пен журналист Оксана Василенко қатысты. Көрмеде әйелдердің тарихтағы ең қатерлі пандемия кезінде өзгелерге көрсеткен риясыз көмегі мен батыл шешімдері бейнеленген.
«Халықаралық әйелдер күні – бұл бүкіл әлемдегі әйелдердің күш-жігерін атап өту мүмкіндігі. Пандемиямен күреске жұмылдырылған жұмысшылардың басым көпшілігі осы әйелдер қауымы. Дәрігерлер мен заңгерлерден бастап еріктілер мен маңызды салаларда қызмет атқаратын қатысушылардан тұратын бұл фотокөрмеден әлемдік дағдарыс жағдайына қарамастан, батылдық, төзімділік пен жанқиярлық туралы әңгімелерімен танысуға болады. Пандемия адамзат баласына бәріміз бірлесіп жұмыс атқарғанда ғана көп нәрсеге қол жеткізетінімізді көрсетті. Осы күні басшылық лауазымдарда қызмет атқармайтын әйелдер де мүмкіндік бар жерде қоғамның әр саласына өзгеріс енгізе алатындығын еске салайық», деді ЮНФПА-ның Қазақстандағы өкілі және Қырғызстан мен Түрікменстан үшін елдік директоры Джулия Валезе. Бұл ретте Қазақстандағы БҰҰ Тұрақты үйлестірушісі Микаела Фриберг-Стори COVID-19-ға қарсы күресте дұрыс шешімдерді қабылдау үшін әйелдердің рөлі маңызды екенін атап өтті.
Инфекционист-дәрігер және вирусолог Қарлығаш Әбдиева шілде айынан бастап COVID-19 тестілеу диагностика бөлімінде жұмыс істеп келеді. Көрме сюжетіне арқау болған маман қиын шақта көмек қолын созуға әр кез дайын екенін айтады. «Мен наурыз айынан бастап «қызыл аймақта» жұмыс істеймін. Олар маған батыр екенімді айтқанда таңғаламын. Иә, біздің арамызда қорқып, кетіп қалғандар болды, бірақ мен кетіп қалсам дәрігердің ақ халатына сатқындығым болып есептелетінін сезіндім. Сол себепті де көмекке мұқтаж адамдарды қиындықпен жалғыз қалдыруды жөн көрмедім», дейді ол.
COVID-19 дағдарысына қосқан әйелдердің үлесі туралы шағын эсселер мен өзге де материалдарды ұйымның ресми сайтынан көруге болады. Фотокөрме Республика сарайында, сондай-ақ метро стансасы мен Mega сауда ойын-сауық орталығында жалғасады.