Денсаулық сақтау министрі Алексей Цой Дүниежүзілік денсаулық сақтау ұйымының өкілдерімен кездесті. Жүздесу барысында ДДҰ-ның Қазақстандағы медициналық-санитарлық алғашқы көмектің (МСАК) рөлін күшейту жөніндегі бағдарламасын іске асыру қырлары, ДДҰ-ның 74-сессиясында МСАК бойынша жоғары деңгейдегі іс-шараларды бірлесіп ұйымдастыру, сондай-ақ ведомство мен ұйымның МСАК жөніндегі географиялық қашық орналасқан офисі (ГҚО) арасындағы ынтымақтастықты дамыту мәселелері талқыланды.
Кездесуге Денсаулық сақтау вице-министрлері, ДДҰ МСАК жөніндегі ГҚО басшысы (Алматы қаласы) Мелита Якаб, ДДҰ Қазақстандағы өкілі (Нұр-Сұлтан қаласы) Каролин Кларинваль, ДДҰ МСАК жөніндегі ГҚО техникалық мәселелер жөніндегі маманы Арнольдас Юргутис, медициналық бағдарламалар жөніндегі техникалық үйлестіруші Виталий Стецик қатысты.
Былтыр желтоқсанда ДДҰ басшылығының қатысуымен МСАК жөніндегі Астана декларациясын ілгерілету бойынша медициналық-санитарлық алғашқы көмектің операциялық тетігі ресми түрде іске қосылды. Сол кезде тараптар елдердегі денсаулық сақтау жүйесін күшейту мүмкіндіктерін талқылады.
«Дүниежүзілік денсаулық сақтау ұйымы, ЮНИСЕФ және Қазақстанның медициналық-санитарлық алғашқы көмекті жаһандық деңгейде нығайту мәселесіндегі үшжақты ынтымақтастығы осыдан 40 жыл бұрын Қазақ КСР астанасында басталған, онда Алматы декларациясы қабылданды. Ол пациентке бағдарланған, физикалық жағынан да, қаржылық жағынан да сапалы және қолжетімді медициналық-санитарлық алғашқы көмек стандартын белгіледі», деді А.Цой.
2018 жылы қабылданған Медициналық-санитарлық алғашқы көмек жөніндегі Астана декларациясы Алматы декларациясының құндылықтарына бейімделген. Елдер мен үкіметтер оның қағидаларымен келісіп, әр адамның денсаулығын сақтау бойынша міндеттемелер қабылдады.
Медициналық-санитарлық алғашқы көмектің операциялық тетігі ДДҰ қолдауымен әзірленді және 2020 жылғы қарашада Дүниежүзілік Денсаулық сақтау Ассамблеясының 73-сессиясында әлемнің 194 мемлекеті мақұлдады. Бұл құжат МСАК жөніндегі Астана декларациясын іске асыру жоспары және МСАК-ті нығайтуға бағытталған стратегиялық және операциялық бірнеше үлгі ұсынады.
Президент Қасым-Жомарт Тоқаевтың тапсырмасымен МСАК ұйымдастыру тәсілдерін түбегейлі қайта қарау бойынша жұмыс жүргізілуде. Денсаулық сақтау министрлігі Қазақстан халқының қажеттіліктеріне және шетелдік практиканың озық жетістіктеріне жауап беретін МСАК-ті дамытудың ұзақ мерзімді стратегиясын қалыптастыру бойынша жұмыс жүргізуде. Атап айтқанда, амбулаториялық-емханалық көмектің қолжетімділігін жақсарту бойынша 2021-2023 жылдарға арналған шаралар кешенінің жобасы дайындалуда. Оның аясында бүкіл халық профилактикалық тексерумен қамтылады, «Ауыл – ел бесігі» арнайы жобасын ескере отырып, денсаулық сақтау инфрақұрылымын дамытудың перспективалық жоспарларына сәйкес кемінде 300 жаңа МСАК нысаны ашылады. Осы шараларды іске асыру үшін МСАК-қа бөлінетін қаржыны 60%-ға дейін арттыру көзделген.