«Астана Опера» театрының қамқорлық кеңесінің мүшелері мен театр труппасының әртістері, қала тұрғындары көшет отырғызды. Ағаш егіп, шаһардың көркеюіне атсалысқан азаматтар халықты ауыл-аймақты абаттандыру мен көгалдандыруға шақырды.
Көшет отырғызу барысында Нұрсұлтан Назарбаев Қорының директоры, «Астана Опера» қамқорлық кеңесінің төрайымы Дариға Назарбаева отырғызылған көшеттер тамырын тереңге жайып, бас қаламен бірге өсіп, жайнай берсін деген тілегін арнады.
«Өздеріңіз білетіндей, емен – ұзақ ғұмырдың символы. Орташа өмір сүру ұзақтығы 300-400 жыл. Ал мамыргүл – көпшілік үшін көктемнің, жастықтың, жаңарудың нышаны. Көшеттер ғасырлар тоғысында бой көтерген әсем астанамыздың көркіне көрік қосады», деді ол.
500 түп емен ағашы мен мың түп мамыргүл көшетін отырғызуға театр әртістерімен бірге Мәдениет және спорт министрі Ақтоты Райымқұлова, Нұр-Сұлтан қаласының әкімі Алтай Көлгінов, «Астана Опера» қамқорлық кеңесінің мүшелері, «Самұрық-Қазына» ҰӘҚ» АҚ Басқарма төрағасы Алмасадам Сәтқалиев, Eurasian Resources Group директорлар кеңесінің төрағасы Александр Машкевич атсалысты.
«Бүгін отырғызылған емен біздің климаттық жағдайға бейімделген. Ал мамыргүл осы өңірде көптеп кездеседі. Сол себепті, көшеттер жайқала өсіп, алып бәйтерекке айналып, елорда тұрғындары мен қала қонақтарының жанына сая болады деген үміттеміз», деді «Астана Опера» театрының директоры, Қазақстанның еңбек сіңірген қайраткері Ғалым Ахмедьяров.