Жетісу тауларының Кербұлақ жайлауында қойтастың үстінде отырған қоңыр баланың дауысы араға жылдар салып кең байтақ қазақ даласының бар өңірінде жаңғырып тұрарын кім білген... Сол бір майдақоңыр, тұнық, ашық әрі жұмсақ дауыс кейінгі жылдар жүзінде әр күн сайын эфирден саңқылдап естіліп жатты.
Ол – қазақ тележурналистикасында түрен салған Бейсен Құранбектің дауысы еді. «Айтуға оңай» деп қоғам өмірі мен адам тағдырына арашашы болған, «Қарекет қылайық» деп қазақ баласын қамсыз жүрмеуге, қайрат қылуға шақырған Бейсен Құранбектің қазасы қалың елдің қабырғасын қайыстырып жібергенін көз көрді, құлақ естіді. Халық өз баласын ұзақ жоқтады. Президент сыйлығының лауреаты, Мәдениет қайраткері Б.Құранбек ұзақ жылдар бұқаралық ақпарат құралдарында еңбек етіп, азаматтық ұстанымы және адамдық қасиетімен елді, жерді сүюдің жарқын үлгісін көрсетіп кетті. Оның авторлық жобалары – «Айтуға оңай» және «Қарекет» бағдарламаларының аспаған асуы, ашпаған есігі, бармаған тақырыбы, айтылмаған сөзі қалған жоқ. Жабыққанның жанынан табылған, жылағанның көз жасын сүрткен, жығылғанға сүйеу болған осы жобалар әлеуметтік ток-шоудың жаңа форматын жасап, озық үлгісіне айналды. Ел ішінде «Айтуға оңай» атанып кеткен азаматтың елдің есінде ендігі қалған сөзі «Қарекет қылайық!» болды. Б.Құранбектің қойын дәптерінде қалған жазбалардың біріне көз салсақ, оның өмірлік принциптері жайлы тағы да ойланамыз: «Ар сақта! Намысты бол! Талаптан! Қарекет қыл! Тәуекел ет! Уәдеге берік бол! Мәрт бол! Ақылға сал! Қайратты бол! Жүрегіңді жылыт! Біліміңді көбейт! Өнер үйрен! Салт-дәстүрді ұста! Дәстүрді, мәдениетті игер! Ата тарихтан тәлім мен шабыт ал! Өзіңе, өзгелерге, айналаңа жақсылық жаса!».