Аты жаман індет, адамзатты аласапыран күйге салған екі жыл ішінде қазаққа қалтқысыз қызмет қылған небір тарландарды арамыздан алып кетті. Сондай ірі азаматтардың қатарында 25 жылдан астам уақыт бойы Қазақстанның түрлі БАҚ-тарында еселі еңбек еткен Михаил Дорофеев болды.
Қырық тоғыз жыл ғұмырында қазақстандық белгілі журналист, Informburo.kz сайты мен 31 арнадағы «Информбюро» бағдарламасының редакторы М.Дорофеев шынымен отандық журналистиканың өркендеп қанат жаюына орасан зор қызмет еткен тұлға болатын.Еңбек жолын Атырау облысында бастаған, кейін республикалық КТК телеарнасында, «Экспресс К», «Город» және «Мегаполис» газеттерінде жұмыс істеген оның мамандығына адал кәсіби журналист болғанын Елбасы Нұрсұлтан Назарбаевтың Дорофеев дүниеден озғанда оның отбасына жолдаған жеделхатынан да аңғаруға болады. «Ол өз ісінің кәсіби маманы еді, үлкен жұмыс тәжірибесі болды. Ол Қазақстан Республикасы Президенті жүлдесінің БАҚ саласындағы лауреаты, Журналистика академиясының академигі, Ұлттық сенім кеңесінің мүшесі болды. Михаил Дорофеев отандық медиа саланың дамуына зор септігін тигізіп, сапа мен кәсіпқойлықтың жаңа стандарттарын енгізуге үлес қосты», деді Тұңғыш Президент.Ақпарат және қоғамдық даму министрі Аида Балаева да журналист М.Дорофеев өмірден озғанда өзінің фейсбуктегі парақшасында: «Михаилді жеке танитын едім, оның өмірден озуы – отандық журналистика үшін өте ауыр қаза. Оның көптеген достары болды, бәрі оны жақсы көрді және құрметтеді, кәсіби және адами қасиеттерін қадірледі. Бәріміз оны сағынатын боламыз», деп жазды.Жақсының аты өлмейді дегенімізбен, ірі тұлғалардың, кәсіби мамандардың орны әрқашан ойсырап тұрады...