Алматы қаласы Санитарлық-эпидемиологиялық бақылау департаментінің басшысы Жандарбек Бекшин қала тұрғындарын өзара байланысты шектеуге шақырды, деп жазады Egemen.kz.
Ж.Бекшиннің айтуынша, соңғы аптада Алматыда КВИ жұқтыру көрсеткіші сауда нысандарында – 35%, отбасылық байланыс арқылы – 19%, қоғамдық көлікте қатынау барысында – 16%, базарларда – 14%, саябақ пен жаяу жүргіншілер көшелерінде 3,6%-ды құрап отыр.
Сонымен қатар туыстармен және көршілермен байланыс кезінде жұқтырған КВИ инфекциясы 0,2–0,4%-ға өсті. Орамішілік азық-түлік емес дүкендерде – 0,1%-ға және қоғамдық тамақтану нысандарында, мейрамханаларда, дәмхана мен асханаларда – 0,2%-ға, монша мен сауналарда – 0,4%-ға өскені байқалды.
«Ashyq» жобасына қатысушы нысандарда жұқтырушылардың үлес салмағы 106-дан 186 адамға дейін артқан. Бұл нысандардың кіреберісіндегі бақылау жұмысының нашарлығын көрсетеді. Осындай әрекеттің салдарынан ХҚКО-да - 16, сауналарда, бассейн мен фитнес-орталықтарда - 11, мейрамханаларда, кафелерде - 8 және банкет залдарында 5 адамның вирус жұқтырғаны анықталған.
Бас санитарлық дәрігері алматылықтарға міндетті түрде бетперде тағуды, жұмыс бөлмесін, үй-жайларды үнемі желдетіп отыруды, адам көп жиналатын орындарға бармауды ескертті. Инфекцияға күдік туындаған жағдайда бірден дәрігердің көмегіне жүгініп, басқа адамдарға жұқтырмау үшін шектеу шараларын сақтау қажет.