Ауылдан шыққан хоккейші қыз Америкада жаттықтырушы болып жүр

Ол еліміздің тарихында тұңғыш рет әйелдер ара­сын­дағы Ұлттық хоккей лигасында (NHL) өнер көрсетті. Бұлбұл – хоккейден Қазақстан ұлттық құрамасының мүшесі. Қазіргі таңда ол АҚШ-та­ғы жасөспірімдер хоккей клубы­ның бірін жаттықтырып жүр. Ол Нью-Джерси штатындағы High School базасында жатты­ғатын Princeton Tiger Lilies team 14U AA Black командасына жетекшілік етеді.

Бұлбұл Жамбыл облысы Тұрар Рысқұлов ауданына қарас­ты Көгершін ауылын­да дүниеге келген. Ол бала күні­нен спортқа қызығып өсіпті. Сондықтан шығар, Көгершін­де қыздарға арналған секция болмағандықтан, 7 жасында боксқа жазылған.

«Әжем маған бал қосылған ыстық сүт ішкізіп, бауырыммен бірге жаттығу залына жі­беретін. Қысқа ғана шашым бар, спорт киімін киіп алып, мәз болып кететінмін. Осы­лайша екі ай жүрдім. Екі ай­дан соң ауылға аудан­нан жат­тық­тырушылар келіп, 7 жас­тағы мені ұл екен деп ойлап, өздерімен бірге алып кет­пек­ші болған. Бірақ жаттықтыру­шы­ларым әжемнің мені еш­қайда жібермейтінін және алдында тұрған ұл емес, қыз бала екенін айтты», деп еске алады хоккейшінің өзі.

Алдына қойған мақсатына жетпейінше тыным таппайтын еңбекқор адамдар болады ғой. Бұлбұл дәл сондай адам. Балалармен бірге жұды­рық­тасып жүріп, кейіннен күрес­ке ауысады. Алайда қыз бала үшін бұл спорттың оңайға соқ­пай­тыны белгілі. Сон­дық­тан Бұл­бұл­дың ата-анасы оның кү­рес­пен айналысуына қарсы шығады.

Кейінірек, Бұлбұл 12 жасқа толғанда отбасымен бірге Алматы қаласына көшіпті. Қаршадай қыз қарап жатпай, спортшы болсам деген арманына ұмтыла түседі. Сөйтіп, қала­дағы әуесқой футбол сек­циясына жазылады. Бірақ сабақ пен алаңның арасында жүгіріп жүру оңай емес. Мұны түсінгендіктен, ата-анасы Бұлбұлды спорт-интернатқа оқуға жібереді.

Бұлбұлдың үлкен спорт­тағы баспалдағы осы кезде бас­талды десек, қателеспейміз. Мектепте қыздарға арнал­­ған футбол үйірмесі жоқ екен. Де­генмен, хоккей ойнауға мүм­­кіндік мол. Өмірі аяғына коньки байлап көрмеген қыз ай­дын­ға абайлап шығады. Бірақ ролик теуіп үйренгендік­тен, мұз­да сырғанау қиындық туғызбапты.

Шайба мен таяқты жаны­на серік еткен Бұлбұл бес жыл мектеп командасында ой­найды. Сөйтіп жүріп Уни­вер­сиадаға қатысты. Таланты­ның арқасында 18 жасында Ұлттық құрамаға шақырту да алды.

Бір қызығы, Бұлбұл 2 жыл регби де ойнаған екен. Осы спорт­пен айналысып жүргенде елор­­дада «Томирис» хоккей клу­­бы құрылып жатқанын ести­­ді. «Құланның қасуына мыл­­тық­тың басуы» сай келіп, коман­да сапына енеді. Көп ұза­май оны клуб капитаны етіп таңдайды.

«Алтыншы сыныпта оқып жүргенде, хоккейге ауыстым. Таңертеңгі жаттығуға үлгеру үшін ұйқыдан таңғы сағат бесте тұратынмын. Алғашында Алматыдағы «Жұлдыз» коман­дасында ойнадым. Сосын жас­тар құрамасына өтіп, Сло­ва­кия­да, Ресейде өткен әлем бі­рін­­шіліктеріне бардым. 2011 жылы Ұлттық құрамаға өттім. Сол жылы Алматыда өткен Қыс­қы Азиада ойындарына қа­ты­суға жасым жетпей қалды...

2 жылға жуық уақыт жат­­тық­қан соң, бізді ешкім қар­жыландырмайтын болды. Сосын мен регбиге ауысып, сол спорт түрінен спорт шеберіне кандидаттығымды қорғадым. Әне-міне регби құрамасына кірем деп жүргенде, Астанада енді ашылып жатқан «Томи­рис» хоккей командасына ша­қырту алдым», дейді Бұлбұл.

Бұлбұлдың айтуынша, мұхит асып, Америкаға бару туралы ой оған 16 жасында Словакияда өткен әлем чемпионатына жүргенде келеді. Содан бастап жатса да, тұрса де шетел асуға аңсары ауады.

Сөйтіп жүргенде танымал жаттықтырушы Сэми Джо Смолдың көзіне түседі. Бұлбұл ағылшын тілін жетік біле­тіндіктен, бір-бірін жақсы түсініп, емен-жарқын тілдеседі. Хоккейші қыздың талантын байқаған жаттықтырушы оны Канадаға шақырыпты.

«Канадада Calgary Coyote ко­мандасына қосылдым. Ал­ға­шында жат елде ойнау қор­қынышты еді. Бірақ артқа шегін­­беуім қажет екенін түсін­дім. Шетел деп келген соң өзің­нің ғана емес, еліңнің намысын қорғауың керек. Басты мақсатым – NHL-ге қосылу еді. Канада арқылы Америкаға бардым. 2019 жылы жазымды Минессоттада өткіздім. Кейіннен Нью-Йорк, Нью-Джерси командаларының іріктеуінен өттім. 16 тамыз күні маған екі команда хабарласып, келісімшарт ұсынды. Қуанышымда шек болмады», дейді Бұлбұлдың өзі.

Сөйтіп қаршадай қыз Нью-Джерси штатындағы Монмут Джанкшен қаласының «Метрополитен Риветерс» клубы­ның сапына қосылды. Бұл­бұлдың шеберлігіне «Риве­т­ерс­тің» бас менеджері де жоғары баға бергені есімізде.

«Қартанбаеваның ше­бер­лігі, ойынға адалдығы оны жан­­күйерлердің сүйікті ойын­шы­­сына, командамыздың белді мү­ше­сіне айналдырары сөзсіз», дейді Кейт Витман Эннис.

Бұлбұл сегіз қырлы, бір сырлы десек қателеспейміз. Ол бос уақытында түрлі волонтерлік іс-шараларға қатысады. Бір қызығы, «Томирис» сапында ойнап жүргенде ол елордада өтетін жәрмеңкелерде печенье пісіріп сатқан.

«Бір күні әлдебір амери­калық сайтты ақтарып отырға­ным­­да, қызылды-жасылды печенье көзіме оттай басылды. Біраз ақпаратқа қаныққан соң, кәсіпкерлік курсындағы та­­ныс­тарыма өзімнің печенье пісір­гім келетінін айттым. Олар менің ойымды қалжың деп қа­­былдап, күлді де қойды. Мен ғ­а­ламторға хабарландыру жаз­­ғаннан кейін жұрттан тап­сы­­рыс түсе бастады», дейді Бұлбұл.

Бұлбұлдың арманы көп. Ол әйелдер хоккейін дамытуға үлес қосқысы келеді. Қазіргі таңда осы мақсатта еңбек етіп жүр.