Мұқтаж жандарға көмек көрсету, балаларды, көпбалалы отбасыларды қолдау бүгінде алматылықтар тарапынан жүзеге асып жатқан қайырымды істердің қатарында. Қалалық білім басқармасы басшысының орынбасары Қайрат Жұманов Өңірлік коммуникациялар қызметінде өткен брифингте «Мектепке жол» акциясының қорытындысымен таныстырды.
Жалпыреспубликалық акция аясында әлеуметтік қорғалмаған және аз қамтылған отбасылардың балаларына көмек көрсету, әртүрлі әлеуметтік салдарға байланысты балалардың мектепке келмей қалу жағдайларын анықтау жұмыстары әрі қарай да жалғасын табады. Осы орайда Қ.Жұманов эпидемиялық жағдайдың сақталуына байланысты «Мектепке жол» дәстүрлі акциясын өткізу платформа арқылы жыл бойы жалғасатынын жеткізді. Көмекке мұқтаж ата-аналар, сонымен бірге қолдау көрсетемін деген демеушілер мен меценаттар www.atamekenim.kz сайтында өтініштерін қалдыра алады.
Қазіргі уақытта әлеуметтік қорғалмаған және аз қамтылған отбасылардан шыққан 22 142 оқушыға 774 млн 970 мың теңге бюджет қаражаты есебінен көмек көрсетілді. Ал акцияға қолдау білдірген Алматы қаласының меценаттары 9 022 оқушыға 123 млн 399 мың теңге көлемінде демеушілік көмек көрсетті. Басқарма басшысының орынбасары сонымен бірге қазіргі кезде жаппай оқыту қоры тарапынан 1-11-сынып оқушылары үшін тегін тамақ ұйымдастырылғанын атап өтті. Бұл мақсатқа жергілікті бюджеттен қаражат қарастырылып, қала мектептеріндегі 24 мыңнан астам оқушы қамтамасыз етілген.